भंगहाका प्रमुख प्रशासकीय अधिकृत र शाखा प्रमुखका श्रीमतीलाई पनि दिइयो नियुक्ति
महोत्तरीको भंगहा नगरपालिकामा प्रमुख प्रशासकीय र शाखा प्रमुखहरूकै श्रीमतीदेखि सालीसम्मलाई करारमा जागिर दिइएको छ । ६ पदमा करार भर्ना गर्न खुला प्रतिस्पर्धा देखाइए पनि कर्मचारीहरूले भागबन्डा गरेका हुन् ।
भंगहा निमित्त प्रमुख प्रशासकीय अधिकृत विजय यादवकी श्रीमती सिर्जना यादवले रोजगार सहसंयोजकमामा जागिर पाएकी छिन् भने स्वास्थ्य संयोजक राजु साहकी श्रीमती कल्पना मैनालीलाई ल्याब असिस्टेन्टमा राखिएको छ । आइटी अफिसर लक्ष्मी रायकी साली सीमा सिंहले अनमीमा करार जागिर पाएकी छिन् । भंगहा नगरपालिकाले ९ पुसमा ६ पदमा करारमा कर्मचारी भर्नाका लागि सूचना जारी गरेको थियो । २४ जना उम्मेदवारले दरखास्त दिएका थिए । १० माघमा परीक्षा भएको थियो । तर, जागिर पाउनेमा सबै कर्मचारीका आफन्त छन् । प्रमुख प्रशासकीय अधिकृत यादवले भने परीक्षामा नातावाद वा कृपावाद नभएको दाबी गरे । ‘म प्रमुख प्रशासकीय हुँदैमा श्रीमतीले काम गर्न पाउँदैनन् भन्ने होइन,’ उनले भने ।
मेयर सञ्जीव साहले कर्मचारी भर्ना प्रक्रियामा आफ्नो कुनै संलग्नता नरहेको र यसबारे जानकारी लिइने बताए । ‘हामी जनप्रतिनिधिले कर्मचारीको दरबन्दी सिर्जना गर्ने हो, कार्यान्वयन कर्मचारीबाट हुन्छ । करारमा ककसले जागिर पाए भनेर मलाई थाहा छैन,’ उनले भने