खेलकुद प्रिन्ट संस्करण

साफ यू–१९ महिला च्याम्पियनसिप आजबाट : छोटो तयारीमा नेपालको उपाधि लक्ष्य

अनुभवी र नयाँ खेलाडी सम्मिलित नेपाली टोली तीन साताको क्लोज क्याम्पको अभ्यासपछि प्रतियोगितामा सहभागी

छोटो तयारीबीच दक्षिण एसियाली फुटबल महासंघ (साफ)को आयोजनामा शुक्रबारबाट सुरु हुने पाँचौँ यू–१९ महिला च्याम्पियनसिप प्रतियोगितामा नेपालले उपाधि जित्ने लक्ष्य राखेको छ । बंगलादेशको ढाकामा नेपालले आयोजक बंगलादेशसँग प्रतिस्पर्धा गर्दै छ । यू–१८, यू–१९ र यू–२० का रूपमा आयोजना हुँदै आएको प्रतियोगिताको नेपालले अहिलेसम्म उपाधि उचालेको छैन । पछिल्ला संस्करणमा राम्रो तयारी र स्तरीय खेल प्रदर्शन गरे पनि नेपाल उपाधिबाट टाढा रहेको थियो । यसपटकको नेपालको तयारी कमजोर देखिन्छ । खुला छनोटपछि तीन साताको प्रशिक्षण गर्दै नेपालले प्रतियोगितामा भाग लिएको हो । 

नेपालका मुख्य प्रशिक्षक बालगोपाल साहुखलले भारत, बंगलादेश र भुटानसहित चार टोली सहभागी प्रतियोगिताबाट उपाधिसाथ स्वदेश फर्कने दाबी गरेका छन् । कप्तान सारा बज्राचार्य छोटो तयारीबीच पनि आशा गर्ने स्थान रहेको बताउँछिन् । दक्षिण एसियाली फुटबलमा नेपालबाहेक भुटानले धेरै राम्रो गरिसकेको छ । बंगलादेशले पनि पछिल्लो दशकमा महिला फुटबलमा ठूलो लगानी गरेको छ । यसको प्रतिफल बंगलादेशले तीनपटक उपाधि नै जितिसकेको छ । भारत प्रतियोगिताको साबिक विजेता हो ।

सहभागी टोलीमध्ये भारत बलियो देखिन्छ । दुई वर्षदेखि घरेलु महिला फुटबल ठप्प रहेको नेपाल उपाधि जित्ने लक्ष्यका साथ बुधबार ढाका प्रस्थान गरेको थियो । ‘तीन साताको तयारी पनि प्रभावकारी भएको छ, खेलाडीबीच तालमेल मिलेको छ,’ प्रशिक्षक साहुखलले नयाँ पत्रिकासँग भने, ‘भारत र बंगलादेश बलिया टोली हुन्, तर उपाधिकै लागि खेल्छौँ ।’ उमेर समूहमा पहिलोपटक आर्म ब्यान्ड लगाउने तयारी गरेकी सारा पनि खेलाडीबीच राम्रो तालमेल रहेको मान्छिन् । उनले उमेर समूहमा सँगै खेलेको खेलाडी रहँदा समस्या नआउने प्रतिक्रिया दिइन् । ‘तयारीको समय कम भयो, तर खेलाडीको मनोबल उच्च छ,’ साराले भनिन्, ‘यसअघि पनि भारत र बंगलादेशसँग खेलेको हुँदा यसपटक नेपालको टोली सबैभन्दा बलियो छ ।’ 

सन्तुलित टोली
कप्तान सारा नेपाली टिम सन्तुलित रहेको बताउँछिन् । यसअघि उनले नेपालको यू–१५, यू–१९ र यू–२० टोलीबाट खेलिसकेकी छिन् । उमेर समूहमा अनुभव भएका कारण उनले खेलाडीबीच तालमेल मिलेको बताइन् । ‘उमेर समूहमा नेपालको प्रतिनिधित्व गरेका खेलाडी भएकाले अनुभवको कमी छैन,’ उनी भन्छिन्, ‘पहिलेदेखि सँगै खेलेको भएर सजिलो छ ।’ कप्तान सारासँगै गोलरक्षक लीला जोशी र रक्षक दिव्या यस्मली मगरले नेपालको यू–२० टोलीबाट यसअघि नै खेलिसकेका छन् । टोलीमा रहेका तीनै गोलरक्षकले नेपालको उमेर समूहबाट खेलिसकेका छन् ।

 गोलरक्षक सुजाता तामाङ र करुणा बुढाथोकीसँगै रक्षक सीता रोकाया, माया मास्के, सिमरन राई, भावना परियार, झुमा विश्वकर्मा, पुनम चेम्जोङ र सुशीला केसी, स्ट्राइकर सेनु परियार, सुक्रिया मियाँ तथा वर्षा ओलीले नेपालको प्रतिनिधित्व गर्दै यू–१७ महिला च्याम्पियनसिप खेलिसकेका छन् । रोजिता विष्ट, सरिताकुमारी नाथ, गंगा रोकाया, बिर्सना चौधरी, लीला चन्द, पूर्णिमा राई, समीक्षा मगर र सजिना स्याङ्तानले पहिलोपटक नेपालको प्रतिनित्व गर्दै अन्तर्राष्ट्रिय खेलमा प्रतिस्पर्धा गर्दै छन् । एन्फाले एक सय ४६ खेलाडीबाट अन्तिममा २३ खेलाडी घोषणा गरेको हो । ‘अधिकांश खेलाडी उमेर समूहबाट खेलेकै कारण टोली बनाउन गर्न सहज भएको प्रशिक्षक साउखलले बताए । ‘हामीले खुला छनोटपछि तीन साता अभ्यास गर्‍यौँ, यसबीचमा खेलाडी छनोट गर्न सहज भयो, यस टोलीबाट नतिजाको आशा गरेको छु,’ उनले भने । 

बंगलादेश सर्वाधिक तीनपटक च्याम्पियन
प्रतियोगिता पाँचौँपटक हुँदै गर्दा बंगलादेश सर्वाधिक तीनपटकको च्याम्पियन हो । भारतले एकपटक उपाधि जितेको छ । नेपाल २०१८ र २०२३ मा मात्रै उपविजेता बनेको थियो । भुटानमा २०१८ मा पहिलोपटक आयोजना भएको प्रतियोगितामा नेपाललाई हराउँदै बंगलादेश च्याम्पियन बन्यो । २०२१ मा बंगलादेशले नै उपाधि चुमेको थियो । यो संस्करण यू–१९ का रूपमा हुँदा भारत फाइनलमा बंगलादेशसँग १–० ले पराजित भयो । 

२०२२ भारतमा यू–१८ स्वरूपमा आयोजना हुँदा घरेलु टोली नै च्याम्पियन भयो । त्यसवेला सिंगल राउन्ड पद्धतिमा आयोजना हुँदा नेपाल, भारत र बंगलादेश मात्रै थिए । भारत शीर्ष स्थानमा रहेर च्याम्पियन भएको हो । २०२३ ढाकामा भएको प्रतियोगिताको फाइनलमा नेपाललाई ३–० ले हराउँदै बंगलादेश तेस्रोपटक च्याम्पियन बन्यो । यसपटक शीर्ष दुईमा रहेका नेपाल र बंगलादेशले उपाधिका लागि प्रतिस्पर्धा गरेका थिए ।