- वि.सं २o८o माघ १२ शुक्रबार
आइसिसी यू– १९ विश्वकप क्रिकेट प्रतियोगिताअन्तर्गत समूह चरणको अन्तिम खेलमा नेपालले अफगानिस्तानबाट एक सय ४६ रनको सामान्य लक्ष्य पाएको छ ।
सुपर सिक्समा प्रवेशका लागि जित्नैपर्ने खेलमा नेपालले अफगानिस्तानलाई ४०.१ ओभरमा एक सय ४५ रनमा अलआउट गर्याे । टेस्ट मान्यताप्राप्त राष्ट्र अफगानिस्तानको युवा टिममाथि नेपाली युवा टिमका बलर पूर्णतः हाबी भएपछि नेपालले सामान्य लक्ष्य पाएको हो ।
तीव्र गतिका बलर आकाश चन्दले घातक बलिङ गर्दै पाँच विकेट लिए । आठ ओभर बलिङ गरेका आकाशले ३४ रन खर्चिए । त्यस्तै, दीपेश कँडेलले आठ ओभरमा १७ रन दिएर दुई, तिलक भण्डारीले आठ ओभरमा २८ रन दिएर एक विकेट लिए ।
यसैगरी, आठ ओभर नै बलिङ गरेका सुवास भण्डारीले १५ रन दिएर एक तथा गुल्सन झाले ४२ रन दिँदै एक विकेट लिए । नेपालले सुरुवातदेखि नै घातक बलिङ गरेपछि अफगानिस्तान कुनै पनि वेला खेलमा हाबी बन्न सकेन ।
पहिलो र दोस्रो रन बनाउँदा अफगानिस्तानले क्रमशः एक र दुई विकेट गुमाएको थियो । यस्तै, १७ रनमा तीन, २७ रनको अवस्थामा चार, ३४ रनको अवस्थामा पाँच तथा ४३ रनको अवस्थामा ६ विकेट गुमाइसकेको थियो ।
यसबीच अफगानिस्तानका असन इसाखिल र एएम घजनफारबीच ४२ रनको साझेदारीपछि अफगानिस्तान खेलमा फर्कने प्रयास गरिरहँदा पुनः धक्का लाग्यो । उसले ८५ रनको अवस्थामा सातौँ र ८८ रनको अवस्थामा आठौँ विकेट गुमायो ।
तर, एएमा घजनफार र कप्तान नासिर खानबीच ५५ रनको साझेदारीपछि अफगानिस्तान केही सम्हालियो ।
