मुख्य समाचार डिजिटल संस्करण

राष्ट्रिय सभा निर्वाचनका लागि मतदाता नामावली स्वीकृत

आगामी ११ माघमा हुने राष्ट्रिय सभा सदस्य निर्वाचनका लागि निर्वाचन आयोगले मतदाता नामावली स्वीकृत गरेको छ।

राष्ट्रिय सभा सदस्य निर्वाचनमा प्रदेश सभा सदस्य र गाउँपालिकाका अध्यक्ष र उपाध्यक्ष तथा नगरपालिकाका मेयर र उपमेयर मतदाता हुने कानुनी व्यवस्था भएबमोजिम प्रदेश सभा सदस्य पाँच सय ४९ जना र गाउँपालिकाका अध्यक्ष र उपाध्यक्ष तथा नगरपालिकाका मेयर र उपमेयर एक हजार चार सय ९८ गरी दुई हजार ४७ जनाको मतदाता नामावली स्वीकृत भएको हो।

निर्वाचन कार्यक्रमबमोजिम आगामी २० पुसमा निर्वाचन अधिकृतको कार्यालयमा स्वीकृत भएको मतदाता नामावली प्रकाशित हुनेछ।

उल्लिखित मतदातामध्ये प्रदेश सभाका सदस्यको मतभार ५३ र गाउँपालिकाका अध्यक्ष र उपाध्यक्ष तथा नगरपालिकाका मेयर र उपमेयरको मतभार १९ रहेकाले आउँदो माघ ११ गते हुने राष्ट्रिय सभा सदस्य चुनावका लागि प्रदेश सभा सदस्यको कुल मतभार २९ हजार ९७ र गाउँपालिकाका अध्यक्ष र उपाध्यक्ष तथा नगरपालिकाका मेयर र उपमेयरको कुल मतभार २८ हजार चार सय ६२ गरी जम्मा ५७ हजार पाँच सय ५९ मतभार छ।