खेलकुद प्रिन्ट संस्करण

नेमार नौ महिना मैदानबाहिर

उरुग्वेविरुद्धको खेलमा चोटग्रस्त बनेका ब्राजिलका नेमार नौ महिनापछि मैदानमा फर्कन सक्ने

ब्राजिलका युवा स्ट्राइकर नेमार जुनियर चोटका कारण कम्तीमा नौ महिना मैदानबाहिर रहने भएका छन् । सन् २०२६ को विश्वकपअन्तर्गत दक्षिण अमेरिकी छनोटमा उरुग्वेविरुद्ध घाइते भएका नेमारको बिहीबार लिगामेन्ट र मेनिस्कसको शल्यक्रिया भएको छ ।

शल्यक्रियापछि नेमार नौ महिना मैदानमा फर्कन नसक्ने चिकित्सकले जनाएका छन् । नेमारको बायाँ घुँडा भाँचिएपछि शल्यक्रिया गरिएको उनी आबद्ध अल हिलालले जनाएको छ । उरुग्वेसँग २–० ले पराजित भएको खेलमा उरुग्वेका निकोलस डी ला क्रुजसँग बल खोस्ने क्रममा नेमार मैदानमा ढलेका थिए ।

मैदानमा सामान्य परीक्षणपछि उनलाई अस्पताल भर्ना गरिएको थियो । ‘घुँडाको शल्यक्रिया भएको छ, यो समय परिवारलाई दिनुपर्छ,’ नेमारले भनेका छन् । मैदानबाहिर रहँदा नेमारले अब विश्वकप छनोटका केही खेल र कोपा अमेरिका गुमाउन सक्छन् । गत अगस्टमा नेमार साउदी अरेबियाको प्रो लिग क्लब अल हिलालमा अनुबन्ध भएका थिए ।

फ्रेन्च लिग वान क्लब पेरिस सेन्ट जर्मेन (पिएसजी)मा ६ सिजनपछि उनी साउदी पुगेका हुन् । सन् २०१७ मा पिएसजीले नेमारलाई बार्सिलोनाबाट भित्र्याउन कीर्तिमानी दुई सय २२ मिलियन युरो खर्चिएको थियो । ‘यो मेरा लागि दुःखद हो, यद्यपि आफूलाई बलियो बनाउनुपर्छ,’ उनले भने । 

ब्राजिलका सर्वाधिक गोलकर्ता
पिएसजीबाट अल हिलालमा आबद्ध हुँदा उनले ७८ मिलियन पाउन्ड पाए । साउदी प्रो लिगमा उनले दुई वर्षको सम्झौता गरेका छन् । उनले अल हिलालबाट प्रतिसिजन एक सय ३० मिलियन पाउन्ड पाउँछन् । नेमारले सन् २०२३ मा मात्रै दोस्रोपटक शल्यक्रिया गरेका छन् ।

यसअघि फेब्रुअरीमा पेरिसमै उनले शल्यक्रिया गरेका थिए । उनी ब्राजिलको राष्ट्रिय टोलीका सर्वाधिक गोलकर्ता हुन् । गत सेप्टेम्बरमा उनले पेलेको ७७ गोलको कीर्तिमान तोडेका थिए । उनले बोलिभियाविरुद्ध दुई गोल गरेका थिए । नेमार चार वर्ष बार्सिलोनामा रहे । त्यस समय उनी करिअरकै उत्कृष्ट लयमा थिए । बार्सिलोनामा उनले एक सय २३ खेल खेल्दा ६८ गोल गरेका थिए ।