Skip This
निःशुल्क लगाइदिनुपर्ने कोभिड– १९ को खोप लगाइदिन २० हजार रुपैयाँ घुस माग्ने हेल्थ असिस्टेन्टलाई विशेष अदालतले भ्रष्टाचार मुद्दामा सजाय सुनाएको छ । शुक्रबार विशेषको इजलासले महोत्तरीको सनषुडा स्वास्थ्यचौकीमा कार्यरत अजयकुमार साहलाई सजाय सुनाएको हो ।
विशेषका अध्यक्ष श्रीकान्त पौडेल तथा सदस्यद्वय यमुना भट्टराई र बलभद्र बास्तोलाको इजलासले यस्तो आदेश दिएको हो । साहले लिएको रकमबराबर २० हजार रुपैयाँ उनलाई जरिवाना हुने फैसलामा उल्लेख छ ।
मुद्दा दर्ता भएको डेढ वर्षपछि विशेषले फैसला गर्दै आंशिक ठहर हुने निर्णय सुनाएको हो । यस मुद्दाका प्रतिवादी कृष्णकुमार यादवले सफाइ पाएका छन् ।
सनषुडास्थित स्वास्थ्यचौकीमा कार्यरत साहको निर्देशनमा घुस लिएका यादवले सफाइ पाएका हुन् । साहले भनेबमोजिम रकम घुस लिन गएका यादवलाई अख्तियार दुरुपयोग अनुसन्धान टंगालको टोलीले नियन्त्रणमा लिएको थियो ।
बयानका क्रममा साहको निर्देशनमा उक्त रकम लिएको भनी यादवले बताएका थिए । सेवाग्राहीलाई कोभिडविरुद्धको जोन्सन एन्ड जोन्सन खोप लगाइदिने कार्यका निम्ति साहले उक्त रकम माग गरेको खुलेको थियो ।
घुस रकम लिइसकेको अवस्थामा पक्राउ परेका यादव र साहलाई प्रतिवादी बनाई १२ माघ ०७८ मा अख्तियारले मुद्दा चलाएको थियो ।
