फ्रान्सका स्ट्राइकर केलियन एम्बाप्पे र पेरिस सेन्ट जर्मेन (पिएसजी)बीच पछिल्लो समय सम्बन्ध त्यति राम्रो छैन । एम्बाप्पे अन्यत्र जान चाहन्छन् । पिएसजी उनलाई सम्झौताका लागि दबाब दिइरहेको छ । खेलाडी र क्लबबीच सन् २०२४ सम्म सम्झौता भएको छ । एम्बाप्पेको मुख्य उद्देश्य नै खेलाडी किनबेच सिजनमा राम्रो क्लबमा जानु हो । पिएसजी उनलाई बिक्री गर्दा आउने ट्रान्सफर रकम कमाउन चाहन्छ । पिएसजीले सम्झौताकै आडमा फ्रान्सेली खेलाडीलाई क्लबमै राख्न कोसिस गरिरहेको हो । यद्यपि, क्लबसँगको सम्बन्धमा चिसोपना आए पनि एम्बाप्पले सिजन ब्रेकमा मस्त देखिन्छन् ।
अमेरिकाका चर्चित सहर मियामीमा उनी प्रेमिकासँग सिजन ब्रेकको बिदा मनाइरहेका छन् । मियामीमा उनी प्रेमिकासँग रहँदा त्यहाँको चर्चित खेल जेन्गासमेत खेल्न भ्याएका छन् । गत सिजन उनले पिएसजी र फ्रान्सका लागि उत्कृष्ट खेल प्रदर्शन गरेका थिए । पिएसजीले ब्याक टु ब्याक फ्रेन्च लिग वान उपाधि जित्दा उनकै योगदान धेरै थियो । उनले समग्रमा पिएसजीबाट ४३ खेलमा ४१ गोल गर्न सफल भए । यसैगरी, राष्ट्रिय टोलीबाट विश्वकपमा उनले १३ गोल गरे । फ्रान्सलाई लगातार दोस्रोपटक फाइनल स्थान पक्का गराउन एम्बाप्पेले प्रेरणादायी प्रदर्शन गरेका थिए ।
फाइनलमा अर्जेन्टिनासँग टाइब्रेकरमा पराजित हुँदा फ्रान्ससँगै एम्बाप्पेको दोस्रोपटक विश्व च्याम्पियन हुने सपना क्षतविक्षत भयो । विश्वकपमा उनले गोल्डेन बुट जिते । एकनासको प्रदर्शन गरेका एम्बाप्पेले मैदानबाहिर चलिरहेको द्वन्द्व बिर्सन चाहन्छन् । आउने दिनमा पिएसजीसँग जस्तो निर्णय भए पनि नयाँ फुटबलको सिजन सुरुअघि उनी आफूलाई फ्रेस बनाउन प्रेमिका र परिवारसँगै मियामी पुगेका हुन् ।
ब्रिटिस क्लबबाट राम्रो प्रस्ताव
२४ वर्षीय खेलाडीले परिवारसँगै ब्रिटिस बोर्ड गेम खेल्दै दिन कटाइरहेका छन् । यसैबीच पेरिसको घटनाप्रति उनले दुःख मनाएका छन् । ‘फ्रान्समा अहिले अस्वाभाविक घटना भइरहेको छ, यसबाट म दुःखी छु,’ उनले भने । युरोपियन मिडियाहरूले एम्बाप्पेलाई भित्र्याउन चेल्सी, लिभरपुल र म्यानचेस्टर युनाइटेड पछि लागेका छन् ।