- वि.सं २o८o चैत १ बिहीबार
इन्टरमियामी कोन्काक्याफ च्याम्पियन्स कपको क्वार्टरफाइनलमा प्रवेश गरेको छ ।
नेपाली समयअनुसार आज बिहान भएको खेलमा मेजर सकर लिग क्लब मियामीले नास्भिल एससीलाई ३–१ (समग्रमा ५–३) गोलअन्तरले पराजित गर्दै क्वार्टरफाइनलमा स्थान पक्का गरेको हो ।
घरेलु मैदानमा मियामीका लागि लुइस सुआरेज, लियोनल मेसी र रोबर्ट टेलरले गोल गरे । नास्भिलका लागि साम सुरिड्जले सान्त्वना गोल गरे । यसअघि नास्भिलको घरेलु मैदानमा दुवैले २–२ को बराबरी खेलेका थिए ।
मियामीले पहिलो हाफमा दुई गोल गरेको थियो भने दोस्रो हाफको सुरुवातमै लियोनल मेसीले मैदान छाडेका थिए । खुट्टामा चोट बोकेका कारण मेसीलाई बोलाइएको प्रशिक्षक टाटा मार्टिनोले बताए ।
मेसीले पहिलो गोलका लागि सुआरेजलाई असिष्ट गरेका थिए भने दोस्रो गोलमा मेसीका लागि सुआरेजले असिष्ट गरेका थिए । सुआरेजले भने पूरै ९० मिनेट मैदानमा बिताए ।
