- वि.सं २o८१ बैशाख १८ मंगलबार
नयाँ सिजनको तयारीका लागि साउदी अरेबियाको भ्रमणमा रहेको इन्टर मियामीलाई मैत्रीपूर्ण खेलमा झड्का लागेको छ । लियोनल मेसी, लुइस स्वारेज, जोर्डी अल्बा, सर्जिओ बेस्क्वेटजस्ता बार्सिलोनाका पूर्वस्टारको उपस्थितिका बाबजुद मियामीले अल हिलालको चुनौती सामना गर्न सकेन ।
किङडम एरिनामा भएको मैत्रीपूर्ण खेल अल हिलालले ४–३ गोलअन्तरले जित्यो । पहिलो हाफ ३–१ ले पछि परेको अवस्थाबाट मियामी ३–३ को अवस्थामा पुगेको थियो । तर, खेल सकि दुई मिनेट बाँकी हुँदा सम्हालिन नसकेको मियामी ४–३ ले खेल सुम्पन बाध्य भयो ।
अल हिलालका लागि अलेक्सजेन्डर मित्रोभिच, अब्दुल्ला अल हमदम, माइकल र माल्कोमले गोल गरे भने मायामीका लागि स्वारेज, मेस्सी र डेबिड रुइजले गोल गरे ।
साउदी भ्रमणको क्रममा मेसी नेतृत्वको मियामीले अब बिहीबार क्रिस्टियानो रोनाल्डोको कप्तानीमा रहेको अल नासारसँग दोस्रो मैत्रीपूर्ण खेल खेल्नेछ । यो खेललाई दुवैका करोडौँ समर्थकले प्रतीक्षा गरिरहेका छन् । युरोपियन क्लबहरू छाडेर रोनाल्डो साउदी तथा मेसी अमेरिका लागेपछि यी दुईबीचको भिडन्त यही मैत्रीपूर्ण खेलले जुराउँदै छ ।
