मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८१ बैशाख ८ शनिबार
  • Saturday, 20 April, 2024
नयाँ पत्रिका काठमाडौं
२०८० असार २२ शुक्रबार १०:१८:००
Read Time : < 1 मिनेट
समाचार प्रिन्ट संस्करण

क्रोएसिया गएकी युवती इराकमा पाँच महिना बन्धक, घटनामा संलग्न एक अभियुक्त पक्राउ 

Read Time : < 1 मिनेट
नयाँ पत्रिका, काठमाडौं
२०८० असार २२ शुक्रबार १०:१८:००

युरोपेली राष्ट्र क्रोएसियामा आकर्षक रोजगारी दिने प्रलोभनमा पारेर इराक पुर्‍याइएकी एक युवतीलाई पाँच महिनासम्म बन्धक बनाउने लमजुङ दोर्दी गापा–६ का ५० वर्षीय देवराज तामाङलाई प्रहरीले पक्राउ गरेको छ । मानव बेचबिखन अनुसन्धान ब्युरोबाट खटिएको प्रहरी टोलीले उनलाई स्वयम्भूबाट पक्राउ गरेको हो ।

उनी स्वयम्भूमा जडीबुटी पसल सञ्चालन गर्दै आएका थिए । प्रहरीका अनुसार उनले पीडित युवतीलाई आकर्षक तलब हुने भन्दै क्रोएसिया जान राजी गराएका थिए । त्यसबापत मोटो रकम असुलेका थिए । त्यसपछि उनले पीडितलाई ९ मंसिर ०७८ मा भिजिट भिसाबाट दुबई हुँदै इराक पठाएका थिए । तर, इराकमा रहेका दलालले पीडित महिलालाई क्रोएसिया नपठाई बन्धक बनाएका थिए ।

प्रहरीका अनुसार महिलालाई इराकको अपार्टमेन्टमा बन्धक बनाई राखिएको थियो । त्यसक्रममा युवतीको पासपोर्ट जफत गरिएको थियो । पीडित युवतीले क्रोएसिया पठाउने वा नेपाल फर्काउन प्रस्ताव गर्दा उल्टै ४३ सय अमेरिकी डलर माग गरेका थिए । रकम दिन नसकेपछि युवती पाँच महिना अपार्टमेन्टमा बन्धक बनेकी थिइन् । 

यसक्रममा युवतीलाई शारीरिक तथा मानसिक यातना दिइएको अनुसन्धानमा संलग्न ब्युरोका प्रवक्ता एसपी कृष्ण पंगेनीले बताए । उनले भने, ‘आकर्षक तलब हुने प्रलोभनमा युवतीलाई इराक लगियो । र, बन्धक बनाइयो । यसक्रममा युवतीलाई शारीरिक तथा मानसिक यातना दिएको अनुसन्धानबाट देखिएको छ । धन्दामा संलग्न एक अभियुक्तलाई पक्राउ गरेका छौँ ।’

ब्युरोका अनुसार यातना सहन नसकेपछि पीडित युवतीले नेपालमा रहेका आफन्तमार्फत एजेन्टलाई पटक–पटक गरी पाँच लाख ४८ हजार रुपैयाँ भुक्तानी गरेकी थिइन् । त्यसपछि मात्रै उनी ७ वैशाख ०७९ मा नेपाल आउन सफल भएकी थिइन् । त्यसलगत्तै युवतीले घटनामा संलग्न अभियुक्तविरुद्ध ब्युरोमा जाहेरी दिएकी थिइन् । सोही जाहेरीका आधारमा ब्युरोले घटनामा संलग्न तामाङलाई गत १७ असारमा पक्राउ गरेको थियो । घटनामा संलग्न अन्य अभियुक्तको खोजी जारी रहेको प्रहरीले जानकारी दिएको छ ।