- वि.सं २o८o जेठ ३१ बुधबार
संसदीय समिति सभापति चयनमा बेवास्ता गरेको गुनासो
सभामुख देवराज घिमिरेले संसदीय समितिको सभापति चयनमा दलहरूले बेवास्ता गरेको भन्दै असन्तुष्टि जनाएका छन् । मंगलबार आफ्नै कार्यकक्षमा सञ्चारकर्मीसँग कुरा गर्दै सभापति चयन नहुँदा सिंगो संसद् नै प्रभावित भइरहेको गुनासो गरेका हुन् ।
१५ वैशाखमा प्रतिनिधिसभाका १० वटा विषयगत समिति गठन भएर २ जेठबाट कार्य प्रारम्भ गरेका थिए । पहिलो बैठक बसेकै महिना दिन पुग्न लाग्दा समिति ज्येष्ठ सदस्यको भरमा चलिरहेका छन् । जसकारण मिनी संसद्को गतिविधि प्रभावकारी हुन सकेको छैन । बैठक पनि नियमित बस्न नसकेको गुनासो सांसदहरूको छ ।
सभामुख घिमिरेले सभापति चयनका लागि पटक–पटक ध्यानाकर्षण गराए पनि दलहरूले सुनुवाइ गरेका छैनन् । ‘नेतृत्व चयन नहुँदा संसद्लाई घाटा भइरहेको छ । छिटोछिटो विधेयक लैजाने कुरामा घाटा भइरहेको छ । घाटा पूर्तिका लागि छिटो गर्नुपर्यो भनेको दलहरूमा गम्भीरता देखिएन । दुई–तीन दिनमा हुने काममा साह्रै धेरै कोसिस गरियो । तर, रमिता हेरेर बस्नुपर्ने अवस्था छ,’ सभामुख घिमिरेले भने ।
दलहरूबाट सुनुवाइ नभएपछि आफूले सभापति निर्वाचनका लागि सूचना निकाल्न परामर्शसमेत गरेको, तर दलहरू सहभागी नभई बहिष्कार गरेमा के गर्ने भन्ने अन्योलका कारण त्यो विकल्पमा अगाडि नबढेको घिमिरेले सुनाए । सुनुवाइ समितिमा ढिलाइ नगर्न चासो दिए पनि घुमाइफिराइ ढिला गरिएको उनको गुनासो थियो । सभापति चयन नहुँदा ज्येष्ठ सदस्यबाट लामो समयसम्म बैठक चलाउन सकस भएको उनले सुनाए ।
