- वि.सं २o७९ फाल्गुण २६ शुक्रबार
सहिद स्मारक ए डिभिजन लिग ०७९–८० को तेस्रो चरणको खेल चलिरहँदा चर्च ब्वाइज युनाइटेडले जितको ह्याट्रिक लगाएको छ ।
आज दशरथ रंगशालामा भएको खेलमा हिमालयन शेर्पा क्लबलाई १–० ले पराजित गर्दै चर्च ब्वाइजले तेस्रो जित हात पारेको हो । लगातार तेस्रो जितपछि ९ अंक जोडेर चर्च ब्वाइज शीर्ष स्थानमा छ ।
चर्च ब्वाइजका लागि आशिष चौधरीले निर्णायक गोल गरे । २०औँ मिनेटमा एरिक विष्टले मध्यभागबाट दिएको लामो पासलाई नियन्त्रणमा लिएर तीनजना डिफेन्डरलाई पछि पार्दै आशिषले लोभलाग्दो गोल गरे ।
यसक्रममा उनले बलमाथि नियन्त्रण, पेस र फिनिसिङ तीनै क्षेत्रमा उनले आफूलाई अब्बल सावित गरे । त्यही गोल नै चर्च ब्वाइजलाई तीन अंक दिलाउन निर्णायक बन्यो ।
पहिलोपटक सहिद स्मारक ए डिभिजन लिग खेलिरहेका आशिषको यो दोस्रो गोल हो । यसअघि नेपाल पुलिस क्लबसँगको खेलमा पनि उनले गोल गरेका थिए ।
