- वि.सं २o७९ माघ २५ बुधबार
काठमाडौं उपत्यकामा फेरि बर्डफ्लु संक्रमण देखिएको छ । कुखुरामा छिटो संक्रमण हुने बर्डफ्लु पछिल्लो समय पहिलोपटक काठमाडौंको नागार्जुन नगरपालिका–६, रामकोटमा देखिएको हो । उक्त क्षेत्रबाट पहिलोपटक चार हजार पाँच सय ९१ कुखुरा, २२ सय ५५ वटा अन्डा नष्ट गरिएको भेटनरी अस्पताल तथा पशुसेवाविज्ञ केन्द्रकी डा. सिजा वाग्लेले बताइन् ।
उनका अनुसार हालसम्म तीन स्थानमा संक्रमण फैलिएको छ । काठमाडौंको तारकेश्वर नगरपालिका वडा नम्बर १ र ७, ललितपुरको खुमलटारमा संक्रमण फेला परेको छ ।
तीनवटै स्थानमा गरी हालसम्म ६ हजार दुई सय १० कुखुरा, पाँच सय ५० किलो दाना र १० हजार दुई सय २५ वटा अन्डा नष्ट गरिएको छ । उनका अनुसार सोमबार तारकेश्वर नगरपालिका वडा नम्बर १ साङ्लामा लोकल कुखुरा चार सय ६२, पाँच सय आठ हाँस र दुई सय किलो कुखुरा नष्ट गरिएको छ । सोही नगरपालिका वडा नम्बर ७ मा पनि संक्रमण फैलिएको छ । जहाँबाट नौ सय ४० कमर्सियल लियर जातका कुखुरा, पाँच हजार चार सय ६० वटा अन्डा र एक सय किलो दाना नष्ट गरिएको छ ।
त्यस्तै, ललितपुरको खुमलटारस्थित कृषि अनुसन्धान परिषद् (नार्क)मा सोमबार नै दुई सय १७ कुखुरा, २५ सय ३० अन्डा र दुई सय ५० किलो दाना नष्ट गरिएको छ । हालसम्म जानकारीमा आएको र परीक्षणपश्चात् देखिएकालाई तत्कालै नियन्त्रणमा लिएको पशु विभागका प्रवक्ता चन्द्र ढकालले जानकारी दिए ।
अहिले संक्रमण देखिएको वरिपरिको स्थानमा परीक्षणको कामलाई तीव्रता दिइएको ढकालले बताए । संक्रमण देखिएको तीन किलोमिटर क्षेत्रफललाई संक्रमण प्रभावित क्षेत्रका रूपमा लिइन्छ । उनले भने, ‘विगतमा जुन स्थानमा संक्रमण देखिएको छ, त्यही स्थानमा पुनः दोहिरिएको छ, त्यसैले अहिलेसम्म नियन्त्रणमै छौँ, आत्तिहाल्नुपर्ने अवस्थामा छैन ।’
