- वि.सं २o७९ पौष २९ शुक्रबार
लुम्बिनी विकास बैंक लिमिटेडका अध्यक्षले पद तथा गोपनीयताको शपथग्रहण गरेका छन् । पुस २६ मा भएको बैंकको १५औँ वार्षिक साधारणसभाबाट निर्विरोध सञ्चालक हुँदै सर्वसम्मत अध्यक्ष चयन भएका चिन्तामणि भट्टराईले नेपाल राष्ट्र बैंकका डेपुटी गभर्नर बमबहादुर मिश्रबाट शपथ लिएका हुन् ।
नवनियुक्त अध्यक्ष भट्टराईले त्रिभुवन विश्वविद्यालयबाट एमबिएसम्मको शिक्षा हासिल गरी विभिन्न समयमा विभिन्न संस्था तथा होटेल व्यवसायको उच्च व्यवस्थापनमा संलग्न रही कार्य अनुभव हासिल गरेको जनाइएको छ ।
उनले साबिक लुम्बिनी फाइनान्स एन्ड लिजिङ कम्पनी लिमिटेडको प्रबन्ध निर्देशक, लुम्बिनी जनरल इन्स्योरेन्सको सञ्चालक, नाडेप लघुवित्त वित्तीय संस्थाको सञ्चालक, डिप्रोक्स लघुवित्त वित्तीय संस्थाको सञ्चालकको अनुभव हासिल गरिसकेको बैंकले जनाएको छ ।
समाज सेवातर्फ उनले रोटरी इन्टरनेसनलसँग विगत दुई दशकभन्दा बढी समयदेखि आबद्ध रही सन् २०१८/०१९ का लागि नेपाल–भुटान डिस्ट्रिक गभर्नर रही सामाजिक सेवामा समेत निरन्तर योगदान पुर्याउँदै आएको जनाइएको छ ।
