- वि.सं २o७९ पौष २७ बुधबार
श्रीमानकाे लात्ती प्रहारबाट झापामा एक महिलाको मृत्यु भएको छ । भोजपुरको अरुण गाउँपालिका– १ घर भई हाल झापाको अर्जुनधारा नगरपालिका– ९ खरबन्दीमा डेरा गरी बस्ने ३५ वर्षीय विश्वराज घिसिङले आफ्नी ३६ वर्षीया श्रीमती प्रमिला भुजेल घिसिङलाई लात्तीले हानेर हत्या गरेका छन् ।
समयमा खाना नपकाएको निहुँमा झै-झगडा हुँदा श्रीमानले लात्तीले पेटमा हान्दा प्रमिलाको सोही स्थानमा मृत्यु भएको जिल्ला प्रहरी कार्यालय झापाका सूचना अधिकारी एवं प्रवक्ता प्रहरी नायब उपरीक्षक वसन्त पाठकले जानकारी दिए ।
लात्ती हान्ने श्रीमान् विश्वराज घिसिङलाई नियन्त्रणमा लिई इलाका प्रहरी कार्यालय अनारमनि झापामा राखी थप अनुसन्धान कार्य भइरहेको प्रहरीले जनाएको छ ।
