- वि.सं २o७९ पौष १७ आइतबार
भैरहवामा विमानस्थलमा नियमित अन्तर्राष्ट्रिय उडानको माग गरिएको छ।
नेपाल एसोसियसन अफ ट्राभल्स एन्ड टुर एजेन्ट (नाट्टा) लुम्बिनी प्रदेशले राष्ट्रिय टोपी दिवसको अवसरमा भैरहवास्थित गौतमबुद्ध अन्तर्राष्ट्रिय विमानस्थलमा नियमित अन्तर्राष्ट्रिय उडानको माग गरेको हो।
नाट्टा लुम्बिनी प्रदेश अध्यक्ष रचना पन्तको अगुवाइमा भएको कार्यक्रममा अन्तर्राष्ट्रिय विमानस्थल परिसरमा त्यहाँ कार्यरत कर्मचारीलाई नेपाली ढाका टोपी लगाइदिएर उडान नियमित गर्न सबैलाई सहकार्यको लागि आह्वान गरिएको थियो।
कर्मचारीलाई टोपी लगाउँदै अध्यक्ष पन्तले भने, ‘जसरी शिरको सान ढाका टोपी रहेको छ, त्यसैगरी लुम्बिनी प्रदेशवासी र नेपालका सबै पर्यटन व्यवसायीका लागि गौतमबुद्ध विमानस्थल सान र मान हो,’ उनले भने, ‘यसको गरिमा बढाउने भनेको यहाँबाट अन्तर्राष्ट्रिय जहाजको उडान निरन्तरताका लागि कर्मचारीको पनि सक्रियता र सकारात्मक सहयोग जरुरी छ।’
कार्यक्रममा पर्यटन व्यवसायी सागर अधिकारीले कुनै पनि बहानामा भैरहवास्थित गौतमबुद्ध अन्तर्राष्ट्रिय विमानस्थलमा अन्तर्राष्ट्रिय उडान कटौती गर्न नहुने बताउँदै कटौती गरेमा सबै लुम्बिनीवासीले आन्दोलन गर्ने चेतावनीसमेत दिए।
पर्यटन व्यवसायी तथा सिद्धार्थ उद्योग वाणिज्य संघका पूर्वअध्यक्ष विष्णुप्रसाद शर्माले ४० अर्बभन्दा बढी लगानी विमानस्थलमा भएको र सय अर्बभन्दा बढी निजी क्षेत्रको लगानी भैरहवा आसपासमा भइरहेको बताए।
भैरहवास्थित गौतमबुद्ध अन्तर्राष्ट्रिय विमानस्थलबाट सात महिनाको अवधिमा ३१ हजार छ सय १८ यात्रुले सेवा लिएको गौतमबुद्ध अन्तर्राष्ट्रिय विमानस्थलका महाप्रबन्धक गोविन्दप्रसाद दाहालले जानकारी गराए।
गत जेठ २ गतेदेखि पुस ३ गतेसम्म सात महिनाको अवधिमा एक सय ५४ वटा उडान र अवतरण भएको उनले जानकारी दिए।
यति वेला अल जजिरा एअरलायन्सले उडान कटौती गरेको छ। हिमालय एअरलायन्सले पनि उडान रोकेको छ। अर्कोतिर भैरहवास्थित गौतमबुद्ध अन्तर्राष्ट्रिय विमानस्थलमा भिजिबिलिटी कम हुँदा आन्तरिक उडानसमेत प्रभावित हुँदै आएको छ।
यद्यपि, यो समस्यालाई निराकरण गर्ने गरी अन्तर्राष्ट्रिय विमानस्थलमा इन्स्ट्रमेट ल्यान्डिङ सिस्टम (आइएलएस) जोडिएको भए तापनि उक्त उपकरण सञ्चालन नहुँदा समस्या सिर्जना भएको छ।
पर्यटन व्यवसायीले आइएलएस तत्काल सञ्चालन गर्न माग गरेका छन्। उडानका लागि कम्तीमा एक हजार पाँच सयको हाराहारीमा भिजिबिलिटी आवश्यक पर्छ तर यति वेला चार- पाँच सयको हाराहारीमा भिजिबिलिटी पुग्दा वेला वेला उडान प्रभावित हुने गरेको छ।
