एसियाली तथा पश्चिमी प्रशान्त क्षेत्रका निर्माण व्यवसायीहरूको अन्तर्राष्ट्रिय संगठन, इफाप्काको ४५औँ सम्मेलनमा भाग लिन नेपाल निर्माण व्यवसायी महासंघको प्रतिनिधिमण्डल माल्दिभ्स प्रस्थान गरेको छ । महासंघका अध्यक्ष रवि सिंहको नेतृत्वमा ६४ सदस्यीय प्रतिनिधिमण्डल माल्दिभ्स प्रस्थान गरेको हो ।
प्रतिनिधिमण्डलमा महासंघका पूर्वअध्यक्ष, पदाधिकारीहरू, कार्यसमिति सदस्यहरू र अन्य निर्माण व्यवसायीहरू रहेका छन् । त्रिभुवन अन्तर्राष्ट्रिय विमानस्थलमा महासंघ प्रतिनिधिमण्डललाई महासंघका कार्यवाहक महासचिव नरहरि थपलिया, कोषाध्यक्ष हिरणकुमार श्रेष्ठलगायतले बिदाइ गरेका थिए ।
सम्मेलनको समाप्तिसँगै इफाप्का अध्यक्षको कार्यभार नेपालले सम्हाल्नेछन् । ४६औँ सम्मेलन अर्को वर्ष काठमाडौंमा हुने भएकाले माल्दिभ्स सम्मेलन नेपालका लागि महत्वपूर्ण भएको अध्यक्ष रवि सिंहले बताए ।
‘संरक्षणसहित निर्माण अझ सुन्दर विश्व बनाऔँ’ भन्ने नारासहित ४५औँ इफाप्का सम्मेलनपश्चात् महासंघका अध्यक्ष रवि सिंहले इफाप्का अध्यक्षको कार्यभार सम्हाल्नेछन् । त्यस्तै, महासचिवको भूमिकामा महासंघका सल्लाहकार वीरेन्द्र पाण्डे रहनेछन् ।
४६औँ इफाप्का सम्मेलन अबको १२ देखि १८ महिनाभित्रमा ‘दिगो पूर्वाधारमा साझेदारी’ भन्ने नारासहित काठमाडौंमा आयोजना हुँदै छ । सन् १९५६ मा स्थापना भएको इफाप्कामा हाल नेपाल निर्माण व्यवसायी महासंघसहित १९ राष्ट्रका निर्माण संगठनहरू आबद्ध छन् ।
