नेपाल प्रहरीले मंगलबारबाट निर्वाचनलक्षित मातहतका सुरक्षाकर्मीलाई सम्बन्धित जिल्ला खटाउने तयारी गरेको छ । नेपाल प्रहरीका अनुसार पहिलो चरणमा प्रहरी प्रधान कार्यालयबाट दुई हजार दुई सय ९३ सुरक्षाकर्मी जिल्ला खटिनेछन् । जसमा प्रहरी जवानदेखि डिएसपीसम्मका सुरक्षाकर्मी हुुनेछन् । प्रहरीका अनुसार उनीहरू खोटाङ, ओलखढुंगा, सोलुखुम्बु, झापा, इलाम, कालिकोट, मोरङलगायत जिल्लामा जानेछन् । निर्वाचन सकिएपछि मात्रै उनीहरू फिर्ता हुनेछन् ।
नेपाल प्रहरीका केन्द्रीय प्रवक्ता डिआइजी टेकप्रसाद राईले निर्वाचनलक्षित सुरक्षाका लागि उपत्यकाबाट पहिलो चरणमा २२ सय सुरक्षाकर्मी जिल्ला पठाउने तयारी रहेको बताए । निर्वाचनमा नेपाल प्रहरीका मात्रै ६७ हजार दुई सय ९६ सुरक्षाकर्मी निर्वाचन सुरक्षा प्रयोजनमा खटिनेछन् । उनीहरूमातहत एक लाख १२ हजार म्यादी रहनेछन् । निर्वाचन सुरक्षार्थ पहिलो घेरामा म्यादी र नेपाल प्रहरीका सुरक्षाकर्मी खटिनेछन् । जसअनुसार प्रतिनिर्वाचनस्थल आठदेखि १२ जनासम्म सुरक्षाकर्मी खटाउने प्रहरीको तयारी छ ।
लिंगअनुसार खटिने सुरक्षाकर्मी
नेपाल प्रहरी र म्यादी
महिला – ३०,६०३
पुरुष – १,८६,६९०महिला – ६,०९८
पुरुष– ६८,९०२सशस्त्र प्रहरी
महिला– ३,११०
पुरुष– ३१,७२८
निर्वाचन आयोगका अनुसार देशभर १० हजार आठ सय ९२ निर्वाचनस्थल तोकिएका छन् । जसलाई सुरक्षा संवेदनशीलताका आधारमा अति संवेदनशील, संवेदनशील र सामान्य गरी तीन तहमा वर्गीकरण गरिएका छन् ।
जसअनुसार तीन हजार चार सय १२ स्थल अति संवेदनशील सूचीभित्र परेका छन् । निर्वाचनस्थलको पहिलो घेरामा नेपाल प्रहरीका तीन र म्यादी ६ जनाको दरले १२ सुरक्षाकर्मी खटिनेछन् । सुरक्षा संवेदनशीलताको दृष्टिले चार हजार चार सय २० स्थल संवेदनशील सूचीभित्र परेका छन् । निर्वाचनस्थलको पहिलो घेरामा नेपाल प्रहरीका तीन र म्यादी ६ गरी नौ सुरक्षाकर्मी खटिनेछन् । तीन हजार ६० निर्वाचनस्थल सामान्य सूचीभित्र परेका छन् । निर्वाचनस्थलमा भने नेपाल प्रहरीको तीन र म्यादी पाँच गरी आठ सुरक्षाकर्मी खटिनेछन् ।
१२ प्रतिशत सुरक्षाकर्मी महिला
आगामी ४ मंसिरमा हुने निर्वाचन सुरक्षार्थ खटिने सुरक्षाकर्मीमध्ये १२ प्रतिशत महिला सुरक्षाकर्मी रहनेछन् । जसमा सबैभन्दा ठूलो हिस्सा नेपाल प्रहरीको रहनेछ । प्राप्त तथ्यांकअनुसार निर्वाचन सुरक्षार्थ नेपाल प्रहरीमातहत म्यादी र नेपाल प्रहरी गरी देशभर दुई लाख १७ हजार दुई सय ९६ सुरक्षाकर्मी खटिनेछन् । जसमध्ये ३० हजार ६ सय तीन महिला सुरक्षाकर्मी हुनेछन् । यो नेपाल प्रहरीमातहत खटिने कुलको संख्याको १४.०८ प्रतिशत हो । बाँकी एक लाख ८६ हजार ६ सय ९३ अर्थात् ८५.९१ प्रतिशत भने पुरुष सुरक्षाकर्मी रहनेछन् ।
निर्वाचनलक्षित सुरक्षाका लागि करिब २३ सय प्रहरी मंगलबारबाट जिल्ला–जिल्ला जानेछन् । उनीहरूले जिल्लास्थित निर्वाचनका लागि आवश्यक सुरक्षाको सबै प्रबन्ध गर्नेछन् । यसका लागि आवश्यक ‘ब्रिफिङ’का काम सकिएको छ ।
डिआइजी टेकप्रसाद राई, प्रवक्ता, नेपाल प्रहरी
नेपाली सेनाबाट मात्रै निर्वाचन सुरक्षार्थ करिब ७५ हजार सुरक्षाकर्मी खटिनेछन् । जसमध्ये ६ हजार ९८ सुरक्षाकर्मी महिला हुनेछन् । यो सेनाबाट खटिने कुल संख्याको ८.१३ प्रतिशत हो । बाँकी ६८ हजार नौ सय दुई अर्थात ९१.८६ प्रतिशत भने पुरुष हुनेछन् । नेपाली सेनाका प्रवक्ता सहायक रथी नरायण सिलवालले सेनामा उपलब्ध सुरक्षाकर्मीको अनुपातकै आधारमा निर्वाचन सुरक्षार्थ महिला–पुरुष सुरक्षाकर्मी खटिने बताए । ‘सेनामा हाल महिला–पुरुष सैनिकको अनुपात १ः१२.३ छ । निर्वाचन सुरक्षार्थ खटिने सैनिकको अनुपात पनि यही आधारमा हो । निर्वाचनमा कुल ७५ हजार सैनिक खटाउने निर्णय भएको छ,’ उनले भने ।
सशस्त्र प्रहरीबाट निर्वाचन सुरक्षार्थ कुल ३४ हजार आठ सय ३८ सुरक्षाकर्मी खटिनेछन् । जसमध्ये महिलाको संख्या तीन हजार एक सय १० रहनेछन् । सशस्त्रबाट खटिने कुल संख्याको यो ८.९२ प्रतिशत हो । बाँकी ३१ हजार सात सय २८ अर्थात् ९१.०८ प्रतिशत सुरक्षाकर्मी पुरुष हुनेछन् । तथ्यांकअनुसार निर्वाचनलक्षित तीनवटै सुरक्षा अंगबाट कुल खटिने महिला सुरक्षाकर्मी ३९ हजार आठ सय ११ छन् । यो कुल संख्याको १२.१६ प्रतिशत हो । तीनवटै सुरक्षा अंगबाट देशभर खटिने कुल सुरक्षाकर्मीको संख्या तीन लाख २७ हजार एक सय ३४ रहेको छ । जसमा दुई लाख ८७ हजार तीन सय २३ सुरक्षाकर्मी पुरुष छन् ।
