लगातार तेस्रो जित निकाल्दै विभागीय टोली नेपाल पुलिस क्लब प्रधानमन्त्री कप पुरुष एकदिवसीय क्रिकेट प्रतियोगिताको सेमिफाइनलमा प्रवेश गरेको छ । कीर्तिपुरस्थित त्रिभुवन अन्तर्राष्ट्रिय क्रिकेट मैदानमा बिहीबार मधेस प्रदेशलाई ६ विकेटले पराजित गर्दै पुलिस अन्तिम चारमा पुग्ने पहिलो टोली बनेको हो । समूह ‘बी’मा पुलिसले एक खेल खेल्न बाँकी छ । तीन खेलबाट ६ अंकसहित पुलिस शीर्ष स्थानमा छ । मधेस, लुम्बिनी र प्रदेश १ ले समान दुई अंक बनाएका छन् । बागमतीले तीन खेलमा खाता खोलेको छैन ।
पुलिसको बलियो साझेदारी
पहिलो ब्याटिङ गरेको लुम्बिनी ४४.२ ओभरमा एक सय ८८ रनमै समेटियो । उत्कृष्ट फर्ममा रहेको पुलिसले ३७.१ ओभरमा चार विकेटको नोक्सानीमा ६ विकेटको जित निकाली अन्तिम चारको स्थान पक्का ग¥यो । पुलिसको जितमा कप्तान दीपेन्द्रसिंह ऐरीले ६६ बलमा ४३ रनको योगदान गरे । उनले पाँच चौका प्रहार गरेका थिए । पुलिसका ब्याट्सम्यानले लगातार चार विकेटका लागि उत्कृष्ट साझेदारी गर्न सफल भए । ओपनर सुनील धमाल र कुशल भुर्तेलबीच पहिलो विकेटका लागि ५५ रनको साझेदारी भयो । कुशलले अमित श्रेष्ठसँग दोस्रो विकेटका लागि ५८ रन जोडे । कुशलले पुनः कप्तान दीपेन्द्रसँग तेस्रो विकेटका लागि ११ रन बनाएका थिए । दीपेन्द्र र आरिफ शेखबीच चौथो विकेटका लागि ६६ रनको नटआउट साझेदारी गर्दै टोलीलाई जित दिलाए ।
सुनीलले ३६ रन जोड्न २६ बलमा चार चौका र दुई छक्का प्रहार गरे । शेखले ५१ बलमा पाँच चौकाको सहयोगमा ३५ रन बनाए । ओपनर कुशलले ३२ रन बनाउँदा ४१ बलमा दुई चौका ठोके । कप्तान दीपेन्द्रले ६६ बलमा पाँच चौकाको मद्दतमा ४३ रन बनाए । बलिङतर्फ लुम्बिनीका अनिल खरेलले दुई विकेट लिए ।
कप्तान देवको अर्धशतकीय इनिङ्स
टस जितेर ब्याटिङ गरेको लुम्बिनीले कप्तान देव खनालको अर्धशतकको साथ पाएको थियो । ओपनर देवले ८८ बलमा सात चौका र दुई छक्कासहित सर्वाधिक ७४ रन बनाएका थिए । यसैगरी, विशालविक्रम केसीले ३० रन र प्रज्वल थापाले २३ रनको योगदान गरे । यसबाहेक अन्य खेलाडीले दोहोरो रन जोड्न नसक्दा लुम्बिनी बलियो योगफल बनाउन चुक्यो । बलिङतर्फ म्यान अफ दी म्याच दीपेन्द्रसिंहले सर्वाधिक चार विकेट लिए । यसैगरी, करण केसी र सागर ढकालले समान दुई विकेट हात पारे ।
मधेसको फराकिलो जित
मूलपानी क्रिकेट मैदानमा भएको मधेस प्रदेशले समूह ‘बी’को अर्काे खेलमा प्रदेश १ लाई ७२ रनको फराकिलो अन्तरले हराएको छ । पहिलो ब्याटिङ गरेको मधेसले ४८.१ ओभरमा सबै विकेट गुमाएर दुई सय १४ रन बनाएको थियो । प्रत्युत्तरमा प्रदेश १ ले ४३.१ ओभरमा एक सय ४२ रन मात्र बनायो । प्रदेश १ का लक कामतले सर्वाधिक २९ रन बनाए । विवेक आनन्द मेहताले २५ रन, फिर्दोष अन्सारीले २२ रनको योगदान गरे । बलिङतर्फ मधेसका मोहम्मद आदिल आलम, रुपेश सिंह, प्रदीप पासवान र विशाल सुस्लिङले समान दुई विकेट लिएका थिए ।
अनिलको अर्धशतक
मधेसका अनिल शाहले अर्धशतकीय इनिङ्स खेले । अनिलले ८९ बलमा पाँच चौका र एक छक्का मद्दतमा सर्वाधिक ६१ रन बनाएका थिए । यसैगरी, विवेक यादवले ३२ रन, रुपेश सिंहले ३० रन तथा रोहन विकले २८ रनको योगदान गरेका थिए । बलिङतर्फ प्रदेश १ का फिर्र्दाेष अन्सारीले सर्वाधिक पाँच विकेट लिए । उनले ९.१ ओभरमा एक मेडनसहित ३४ रन खर्चिए । कप्तान सिद्धान्त लोहनीले तीन विकेट लिए ।
