लमजुङमा डेंगुको संक्रमण बढ्दै गएको छ। गत वर्षको तुलनामा यो वर्ष डेंगुका बिरामी धेरै देखिएका छन्। गत वर्ष आठजना संक्रमित देखिएकोमा पछिल्लो दुई महिनामै १० जनामा डेंगु संक्रमण देखिएको छ ।
स्वास्थ्य कार्यालयका अनुसार साउनमा ६ जना र भदौमा चारजनामा डेंगु संक्रमण देखिएको छ । जिल्ला अस्पतालमा नौजना र एकजना सुन्दरबजारस्थित नमुना सामुदायिक अस्पतालमा परीक्षण गर्दा डेंगु संक्रमण देखिएको स्वास्थ्य कार्यालय प्रमुख अमर दवाडीले बताए ।
जिल्ला अस्पताल प्रमुख हेमन्त श्रेष्ठका अनुसार तीन सय ७५ जना बिरामीको परीक्षण गरिएकोमा अस्पतालमा नौजनामा डेंगु देखिएको हो । डेंगुबाट बेँसीसहर नगरपालिकाका चारजना, राईनास र सुन्दरबजार नगरपालिकाका दुई–दुईजना साथै दोर्दी र मर्स्याङ्दी गाउँपालिकाका एक–एकजनामा डेंगु संक्रमण देखिएको छ ।
यसमा सात महिना, एक वर्ष र पाँच वर्षकादेखि ६० वर्षसम्मका छन् । पाँच पुरुष र पाँच महिलामा यस वर्ष डेंगु संक्रमण देखिएको उनले बताए ।
