पूर्वाधार सम्मेलनमा भारतीय राज्यमन्त्री आउने

शुक्रबार, १० भदौ, २०७९
डिजिटल संस्करण

आगामी २३–२४ भदौमा काठमाडौंमा आयोजना हुने पूर्वाधार सम्मेलनमा भारतको सडक यातायात, राजमार्ग तथा नागरिक उड्डयन राज्यमन्त्री जनरल विजयकुमार सिंह सहभागी हुने भएका छन् । नेपाल उद्योग परिसंघले आयोजना गर्ने सम्मेलनमा ‘गेस्ट अफ अनर’का रूपमा राज्यमन्त्री सिंहलाई निम्त्याइने भएको हो । 

परिसंघले आसन्न ‘नेपाल पूर्वाधार सम्मेलन २०२२’ मा गेस्ट अफ अनरका रूपमा सहभागी हुन भारतीय राज्यमन्त्री सिंहलाई निमन्त्रणा गरेको छ । परिसंघको तर्फबाट अध्यक्ष विष्णुकुमार अग्रवालले बिहीबार नयाँदिल्लीस्थित मन्त्रालयमा राज्यमन्त्री सिंहलाई भेटेर निमन्त्रणा गरेका हुन् । राज्यमन्त्री सिंहलाई सम्मेलनमा सहभागी हुन यसअघि भौतिक पूर्वाधार तथा यातायात मन्त्रालयले समेत औपचारिक रूपमा निमन्त्रणा पठाइसकेको छ ।

परिसंघले भौतिक पूर्वाधार तथा यातायात मन्त्रालयसँगको सहकार्यमा भदौ २३ र २४ गते (सेप्टेम्बर ८–९, २०२२) मा पूर्वाधार सम्मेलन आयोजना गर्दै छ । कमजोर भौतिक पूर्वाधारका कारण नेपालको औद्योगिक विकासमा बाधा र व्यवसाय सञ्चालन लागत उच्च रहँदै आएको छ । दिगो भौतिक पूर्वाधार विकासलाई प्राथमिकतामा राखेर परिसंघले ‘विकासका लागि पूर्वाधार’ मूल नाराका साथ चौथो संस्करणको नेपाल पूर्वाधार सम्मेलन आयोजना गर्न लागेको हो । नेपालकै सबैभन्दा ठूलो पूर्वाधारसम्बन्धी यस दुईदिने सम्मेलनमा २५ भन्दा बढी देशबाट कम्तीमा एक हजारजनाको सहभागिता हुनेछ ।

भारतीय पूर्वाधार विकासको अभियानमा एक नेतृत्वकर्ताका रूपमा रहेका राज्यमन्त्री सिंहको उपस्थितिले नेपाललाई अत्यावश्यक पूर्वाधार विकासका लागि घचघच्याउने विश्वास लिएको अध्यक्ष अग्रवालले बताए । नेपाल भूपरिवेष्ठित मुलुक भएकाले भारतीय पूर्वाधारहरूसँगको सम्पर्क अपरिहार्य रहेको सन्दर्भमा पूर्वाधारमा भारतले हासिल गरेको सफलतालाई सहजै नेपालमा अनुसरण गर्न सकिन्छ । 

सुझावित समाचार