चारवटै समितिको सभापतिमा एक–एकजनाको मात्रै उम्मेदवारी
लुम्बिनी प्रदेश सभाका चारवटा विषयगत समितिका सभापति चयनको प्रक्रिया एक वर्षपछि अगाडि बढाइएको छ । कुनै–कुनै समिति एक वर्षभन्दा पनि लामो समयसम्म सभापतिविहीन रहेको अवस्थामा बुधबार सभापति चयन प्रक्रिया अगाडि बढाइएको हो ।
बुधबार सभापतिका लागि उम्मेदवारी दर्ता गरिएको छ । प्रदेश सभाका सचिव दुर्लभकुमार पुन मगरका अनुसार चारवटै समितिको सभापतिमा एक–एकजनाको मात्रै उम्मेदवारी परेको छ । यहाँ सार्वजनिक लेखा समितिमा एमालेका विष्णु पन्थीको उम्मेदवारी परेको छ । त्यस्तै अर्थ, उद्योग तथा पर्यटन समितिको सभापतिमा राजमोकी तारा जिसीको उम्मेदवारी परेको छ ।
सामाजिक विकास समितिमा एमालेका बाबुराम गौतम र कृषि वन तथा वातावरण समितिको सभापतिमा एमालेकै जाल्पा भुसालको उम्मेदवारी परेको छ । बुधबार उम्मेदवारी दर्ताको कार्यक्रम सकिएको र बिहीबार समितिका छुट्टाछुट्टै बैठकबाट सभापति चयन भएको घोषणा गरिनेछ । सभापतिहरूको शपथ शुक्रबार हुने प्रदेश सभा सचिव दुर्लभकुमार पुन मगरले बताए ।
लुम्बिनी प्रदेश सभामा ६ वटा विषयगत समितिमध्ये चारवटा समिति लामो समयदेखि सभापतिविहीन हुँदा समितिका काम प्रभावित हुँदै आएका थिए । लुम्बिनी प्रदेश सभामा सार्वजनिक लेखा समिति, अर्थ, उद्योग तथा पर्यटन समिति, प्रदेश मामिला तथा कानुन समिति, कृषि वन तथा वातावरण समिति, भौतिक पूर्वाधार तथा विकास समिति र सामाजिक विकास समिति रहेका छन् ।
लेखा समितिका तत्कालीन सभापति डिल्ली चौधरी नयाँ सरकार गठनसँगै मन्त्री भएपछि सभापति पद खाली छ । त्यस्तै अर्थ, उद्योग तथा पर्यटन समितिको सभापति माओवादी केन्द्रका सांसद दधिराम न्यौपाने थिए जो माओवादी केन्द्र छाडेर एमालेमा आबद्ध भएपछि पार्टीले कारबाही गरेसँगै उनको सांसद पद गुमेसँगै समिति सभापतिविहीन भयो ।
कृषि, वन तथा वातावरण समितिका सभापति विजयबहादुर यादव मन्त्री भएपछि यो समिति पनि सभापतिविहीन भएको थियो । यादव एमाले नेता शंकर पोखरेल नेतृत्वको सरकारमा मन्त्री भएका थिए । पछि उनको दल जसपाले पार्टी निर्णयविपरीत सरकारमा सामेल भएको भन्दै कारबाही गरेपछि उनको पनि सांसद पद गुमेको हो । सभापतिविहीन अर्को समिति सामाजिक विकास समितिका सभापति थिए दृगनारायण पाण्डे । पोखरेल नेतृत्वको सरकारलाई अल्पमतमा पार्ने क्रममा उनले सांसद पदबाटै राजीनामा दिएका थिए । उनले राजीनामा दिएसँगै सभापति पद खाली भएको थियो ।
