यस मनसुन सिजनको पहिलो महिना जुन (०७९ जेठ १८ देखि असार १६) मा मापन गरिएको वर्षाको तथ्यांकअनुसार प्रदेश नं १, मधेस र बागमती प्रदेशका अधिकांश केन्द्रहरू तथा गण्डकी प्रदेशका धेरैजसो केन्द्रहरूमा सरदरभन्दा बढी वर्षा मापन गरिएको जल तथा मौसम विज्ञान विभागले जनाएको छ ।
विभागका अनुसार कर्णाली प्रदेश र सुदूरपश्चिम प्रदेशका अधिकांश केन्द्रहरू र लुम्बिनी प्रदेशको बर्दियामा सरदरभन्दा कम वर्षा मापन भएको छ।
विभागका अुनसार मापन गरिएका कुल ९० केन्द्रहरूमध्ये ५७ केन्द्रहरूमा सरदरभन्दा बढी, १३ केन्द्रहरूमा सरदर र २० केन्द्रहरूमा सरदरभन्दा कम वर्षा भएको छ। उक्त केन्द्रहरूमा जुन महिनामा भएको औसत वर्षा (३७८.२ मिमि) सरदर वर्षाको १३५.४ प्रतिशत रहेको छ।
