‘मनको बाँध’ (२०३०) ‘ब्ल्याक एन्ड ह्वाइट’ प्रविधिका बनेको अन्तिम नेपाली सिनेमा थियो । यसपछि नेपाली सिनेमा निर्माण रंगीन प्रविधिमा प्रवेश गर्यो । आमा (२०२२), हिजो आज भोलि (२०२५), परिवर्तन (२०२८ ) पनि ‘ब्ल्याक एन्ड ह्वाइट’ (श्यामश्वेत)मा नै बनेका थिए । ०३४ सालमा पहिलो रंगीन सिनेमा बन्यो ‘कुमारी’ ।
यसबीचको अवधिमा नेपाली सिनेमा निर्माणले प्राविधिक रूपमा ठूलो फड्को मारिसकेको छ । ‘ब्ल्याक एन्ड ह्वाइट’ रिलबाट र अत्याधुनिक डिजिटल प्रविधिमा पुग्न दशकौँ लाग्यो । तर, निर्देशक सुवर्ण थापा भने फेरि ‘ब्ल्याक एन्ड ह्वाइट’(श्यामश्वेत) सिनेमा बनाएर रिलिजको तयारीमा छन् ।
उनकै लेखन तथा निर्देशनमा बनेको ‘ब्ल्याक एन्ड ह्वाइट’ ‘द सेक्रेट अफ राधा’ २४ भदौदेखि देशभर रिलिज हुँदै छ । सिनेमामा गाउँले युवती राधाले आप्रवासी कामदारको रूपमा खाडी मुलुक पुगेका श्रीमान् बेपत्ता भएपछि खोज्न थालेको यात्राको कथा छ । अभिनेत्री सृष्टि श्रेष्ठ राधाको भूमिकामा छिन् ।
सिनेमाको पात्रको भावनालाई जोड दिन ‘ब्ल्याक एन्ड ह्वाइट’मा निर्माण गरेको उनी बताउँछन् । थापा भन्छन्, ‘विश्वमा सिनेमाको सुरुवात ‘ब्ल्याक एन्ड ह्वाइट’बाटै भएको हो । हिजोका ‘ब्ल्याक एन्ड ह्वाइट’मा सिनेमालाई आजको पुस्ताले बिर्सिंदै जान थाले । राधा नयाँ पुस्ताका दर्शकलाई नयाँ अनुभव हुनेछ । त्यसकारण पनि हामीले ‘ब्ल्याक एन्ड ह्वाइट’ देखाउने जमर्काे गरेका हौँ ।’
अन्तर्राष्ट्रिय फिल्म फेस्टिबलमा राधालाई श्यामश्वेतमै सहभागी गराउने सुवर्णको तयारी छ । उनी भन्छन्, ‘नेपाली हलमा राधालाई रंगीन र ब्ल्याक एन्ड ह्वाइट दुवैमा रिलिज गर्छौँ । तर, अन्तर्राष्ट्रिय फिल्म फेस्टिवलमा भने ‘राधा’लाई ब्ल्याक एन्ड ह्वाइटमा पठाउँछौँ ।’
सुवर्ण थापा, चलचित्र निर्देशक
विश्वमा सिनेमाको सुरुवात ‘ब्ल्याक एन्ड ह्वाइट’बाटै भएको हो । हिजोका ‘ब्ल्याक एन्ड ह्वाइट’ सिनेमालाई आजको पुस्ताले बिर्सिंदै जान थाले । त्यसकारण हामीले ‘ब्ल्याक एन्ड ह्वाइट’ देखाउने जमर्काे गरेका हौँ ।
तर, ब्ल्याक एन्ड ह्वाइटमा लगानीकर्ता भेटिँदैनन्
अहिलेको अवस्थामा ‘ब्ल्याक एन्ड ह्वाइट’मा सिनेमा निर्माण गर्नु आफैँमा चुनौतीको विषय ठान्छन् उनी । उनी भन्छन्, ‘ब्ल्याक एन्ड ह्वाइट सिनेमा निर्माण गर्नु निकै चुनौती छ । यस्तो सिनेमा निर्माणका लागि लगानी जुटाउन गाह्रो छ ।’
हुन त यसअघि उनले सर्ट फिल्म ‘मलामी’ पनि श्वामश्वेतमै बनाएका थिए । ‘मलामी’ले थुप्रै अन्तर्राष्ट्रिय फिल्म फेस्टिवलमा अवार्ड जितेको थियो । त्यसकारण उनी सिनेमामा ‘कलर’भन्दा ‘कन्टेन्ट’मा विश्वास गर्छन् । उनको बुझाइमा ब्ल्याक एन्ड ह्वाइट पनि एउटा कलर नै हो । उनी भन्छन्, ‘सिनेमामा कन्टेन्ट निकै महŒवपूर्ण हुन्छ । पात्रले भन्न खोजेको कुरा श्यामश्वेतमा प्रस्ट हुन्छ । उसको भोगाइलाई दर्साउन पनि श्यामश्वेतमै सिनेमा बनाउने जमर्काे गरेका हौँ ।’
‘राधा’ले दक्षिण कोरियाको बुसान फिल्म फेस्टिवलबाट स्क्रिप्ट डेभलपमेन्टमा १० लाख ग्रान्ट पाएको उनले बताए । उनले श्यामश्वेतमै सिनेमा स्क्रिप्ट ‘पिच’ गरेका थिए । उनी भन्छन्, ‘विदेशमा ब्ल्याक एन्ड ह्वाइट सिनेमाको महŒव अझै पनि छ । ब्ल्याक एन्ड ह्वाइट सिनेमाको युग संसारबाटै सकिएको भने छैन ।’ ‘राधा’ले नेपाली दर्शकलाई नयाँ स्वाद दिने उनको दाबी छ ।
उनले सन् २०१३ मा बनाएको सिनेमा ‘सुनगाभा’को कथा महिला समलिंगीमाथि थियो । यो सिनेमालाई हलमा प्रदर्शन गर्न निर्माण गरे पनि व्यावसायिक रूपमा सफल नभएको उनी सुनाउँछन् । ‘मैले त्यो ‘च्यालेन्जिङ इस्यु’लाई उठाएको थिएँ । महिला र पुरुषबीचको प्रेमबारे मात्रै सिनेमा बनिरहेको वेला महिला–महिलाबीचको प्रेमलाई समेटेको थिएँ,’ उनी भन्छन्, ‘मलाई त्यसवेला यो कथा भन्न छिटो भयो भनेका थिए । नकारात्मक प्रचार पनि गरियो । थुप्रै आलोचना पनि खेप्नुपर्यो।’
‘सुनगाभा’ले स्वदेशी बजारमा भन्दा विदेशी बजारमा चर्चा पायो । सुनगाभा क्यानडाको मोन्ट्रियाल वल्र्ड फिल्म फेस्टिवल, जर्मनीको हेम्बर्ग फिल्म फेस्टिवल, फ्रान्सको इन्टरनेसनल फेस्टिवल अफ युथ डाइरेक्टरस्लगायतका फेस्टिवलमा प्रदर्शन भयो ।
त्यसपछि उनले ‘फन्को’ र ‘बाटोमुनिको फूल–२ निर्देशन गरे । तर, यी दुई सिनेमा पनि व्यावसायिक रूपमा सफल भएनन् । सिनेमाले उठाएको मुद्दा बलियो भए पनि दर्शकको साथ नपाएको उनी बताउँछन् । ‘अलग धारको सिनेमाबाट कमर्सियल सिनेमा बनाउन हात हालेको थिएँ तर सफल भइनँ । फन्को र बाटोमुनिको फूल–२ मेरा लागि सिकाइ भयो,’ उनले भने ।
