आइजिपी शैलेन्द्र खनालले सोमबारदेखि अनिवार्य अवकाश पाए पनि सरकारले उनको उत्तराधिकारी तोक्न सकेन
सुरक्षा निकायमाथिको राजनीतिले चुनावको मुखमा सशस्त्र प्रहरी बल ‘नेतृत्वविहीन’ बनेको छ । सशस्त्र प्रहरीका महानिरीक्षक शैलेन्द्र खनालले सोमबारदेखि अनिवार्य अवकाश पाएपछि सरकारले उनको उत्तराधिकारी तोक्न सकेन । सरकारले अन्तिम दिनसम्म पनि महानिरीक्षक नियुक्त गर्न नसक्दा खनाल वरिष्ठ एआइजी पुष्पराज केसीलाई निमित्त महानिरीक्षकका रूपमा इन्चार्ज बुझाएर बिदा भएका छन् ।
सुरक्षा निकायका प्रमुख सामान्यतया एक महिनाअघि नै बिदामा बस्ने प्रचलन भए पनि सरकारले समयमै नयाँ नेतृत्व छान्न नसक्दा यस्तो अवस्था आएको हो । सामान्यतया सोमबार मन्त्रिपरिषद्को नियमित बैठक बस्ने भए पनि यसपटक कसलाई सशस्त्रको महानिरीक्षक बनाउने भन्ने अन्योलताले निर्णय हुन नसकेको स्रोत बताउँछ । सशस्त्र प्रहरीमा पहिलोपटक नेतृत्व हस्तान्तरणमा यस्तो समस्या देखिएको हो । एआइजी केसीले वरिष्ठताका आधारमा निमित्तको जिम्मेवारी सम्हाले पनि सरकारले यसबारे कुनै निर्णय नगर्दा संगठन नेतृत्वविहीनजस्तो अवस्थामा पुगेको सशस्त्र प्रहरी अधिकारीहरू बताउँछन् ।
चारवर्षे अवधिका कारण अवकाश पाएका खनालकै ब्याचका केसी र रामशरण पौडेलबीच तीन साताका लागि आइजिपी बन्न तँछाडमछाड हुँदा सरकारले निर्णय गर्न नसकेको हो । केसी र पौडेलमध्ये जो भए पनि उनीहरूले १९ वैशाखमा अवकाश पाउनेछन् । त्यसपछि सशस्त्रमा नयाँ आइजिपी चयनमा पनि सरकारले समयमै निर्णय नगरेर अस्वस्थ चलखेलको वातावरण बनाइदिएको छ ।
