लोकतान्त्रिक समाजवादी पार्टी (लोसपा)ले आगामी स्थानीय तहको निर्वाचनमा गठबन्धन गर्ने जिम्मेवारी सम्बन्धित पार्टी समितिलाई दिने निर्णय गरेको छ । केन्द्रीय कार्यकारिणी समितिको बिहीबार बसेको बैठकले आगामी ३० वैशाखमा हुने स्थानीय तहको निर्वाचनमा पार्टीले कुनै पनि खास पार्टीसँग गठबन्धन नगर्ने निर्णय गरेको हो ।
स्थानीय आवश्यकता र औचित्यको आधारमा गठबन्धन गर्न पार्टीको स्थानीय पार्टी समितिलाई अधिकार दिइएको नेता लक्ष्मणलाल कर्णले जानकारी दिए । स्थानीय तहले आवश्यकता र औचित्य हेरी गठबन्धन गर्न सक्ने र त्यसको अनुगमन गर्ने जिम्मेवारी भने प्रदेश र जिल्ला समितिलाई दिइएको उनले बताए ।
उनले भने, ‘आजको सम्पूर्ण बैठक स्थानीय निर्वाचनलाई नै केन्द्रित गरेर बृहत् छलफल भयो । त्यो छलफलबाट एउटा गठबन्धन सम्बन्धमा पनि हामीले निर्णय गर्यौँ । अहिले हामीले कुनै खास दलसँग गठबन्धन गर्दैनौँ । जिल्ला, प्रदेश र स्थानीय तहले आवश्यकता हेरी औचित्यका आधारमा गठबन्धन गर्न दिने निर्णय भएको छ । त्यसको अनुगमन जिल्ला र प्रदेश समितिले गर्नेछ ।’
बैठकले पार्टीको विधानलाई परिमार्जनसहित पारित गरेको पनि उनले जानकारी दिए ।
