स्थानीय तहको निर्वाचनका लागि मंगलबारदेखि म्यादीप्रहरी भर्नाको छनोट सुरु भएको छ । एक लाख माग भएकोमा २ लाख ९३ हजारले आवेदन दिएका छन् । प्रहरी प्रधान कार्यालयका अनुसार तीमध्ये ३२ हजार १२ जना १२ कक्षा उत्तीर्ण गरेका छन् ।
त्यस्तै, तीन सय ४१ जना स्नातक तह उत्तीर्ण गरेका छन् । एसइई उत्तीर्ण गरेका आवेदक ८३ हजार दुई सय ११ छन् । एक लाख ७७ हजार सात सय ५० जनाभने एसइईभन्दा कम पढेकाहरू छन् । म्यादीमा भर्नाका लागि साधरण लेखपढ गरेका व्यक्ति पनि योग्य ठहरिन्छन् । तर, छनोटमा पढाइलाई समेत आधार बनाइने प्रहरी प्रवक्ता एसएसपी विष्णुकुमार केसीले बताए ।
आवेदन दिनेमध्ये करिब ७० प्रतिशत ३० वर्षभन्दा कम उमेरका छन् । सबैभन्दा धेरै २० देखि ३० वर्ष उमेरका युवा छन् । यो उमेर समूहका एक लाख ३३ हजार चार सय ७६ तथा २० वर्षसम्मका ८३ हजार ६ सय २९ छन् । ३० देखि ४० वर्ष उमेरका ५४ हजार ८ सय ४७ तथा ४० देखि ५४ वर्षका २१ हजार तीन सय ६३ रहेको प्रहरी प्रधान कार्यालयले जनाएको छ । दरखास्त दिनेमध्ये ६९ हजार ६ सय ८० महिला छन् ।
२९ सय मतदानस्थल अतिसंवेदनशील, तर तीन मात्रै सुरक्षाकर्मी खटिने
१० हजार ७ सय ५६ मध्ये दुई हजार नौ सय ४६ मतदानस्थलाई गृह मन्त्रालयले अतिसंवदनशीलको सूचीमा राखेको छ । ६ वटा कारणले ती मतदानस्थललाई अति संवेदनशीलमा राखिएको छ । खुला सीमा क्षेत्रका, पहिलेको निर्वाचनमा झडप भएका, भूमिगत तथा सशस्त्र विभिन्न समूहबाट सुरक्षा चुनौती भएका, दुर्गम क्षेत्रका र जिल्ला सुरक्षा समितिले अति संवेदनशील भनेर तोकेका मतदानस्थललाई अतिसंवेदनशील सूचीमा राखिएको छ । तर, अति संवेदनशील मतदान केन्द्रमा पनि अन्यमा जस्तै तीनजना मात्र प्रहरी खटिनेछन् ।
मतदान केन्द्रलाई सामान्य, संवेदनशील र अतिसंवेदनशील गरी छुट्याइएको छ । अतिसंवेदनशीलमा ८, संवेदनशीलमा ६ र सामान्यमा पाँच म्यादीप्रहरी खटिनेछन् । यसअघिको निर्वाचनमा अतिसंवेदनशीलमा ५ प्रहरी र १० म्यादी प्रहरी खटाइएको थियो । यसपटक एकै चरणमा चुनाव हुँदा जनशक्तिको अपुग भएकाले थोरै मात्र खटिनेछन् । त्यस्तै, चार हजार चार सय २० संवेदनशील र तीनहजार तीन सय ९१ मतदान स्थललाई सामान्यमा राखिएको छ ।
