नेपाली कांग्रेस लुम्बिनी प्रदेश सभापति अमरसिंह पुनले आगामी निर्वाचनमा कांग्रेसले गठबन्धन गरेर जाँदा कांग्रेसको हालत भारतीय कांग्रेसको जस्तो हुने बताएका छन् । शुक्रबार जारी पार्टीको केन्द्रीय कार्यसमितिको बैठकमा बोल्दै पुनले यस्तो बताएका हुन् । बैठकमा गठबन्धनबारे आफ्नो धारणा राख्न प्रदेश सभापतिहरूलाई समय दिइएको थियो ।
बैठकमा सहभागी प्रदेश १ का सभापति उद्धव थापा र बागमती प्रदेशका सभापति इन्द्र बानियाँले पनि आगामी निर्वाचनमा केन्द्रबाट गठबन्धन गर्न नहुनेमा जोड दिएका छन् । गठबन्धन गर्दा स्थानीय आवश्यकताअनुसार गर्नुपर्ने उनीहरूको तर्क छ । कर्णाली प्रदेशका सभापति ललितजंग शाहीले माओवादीको प्रस्तावअनुसार गठबन्धन गर्ने हो भने धेरै जिल्लामा कांग्रेस निल हुने धारणा राखेका छन् । निर्वाचनमा गठबन्धनबारे निर्णय लिने विषयमा कांग्रेसको केन्द्रीय कार्यसमितिको बैठक जारी छ । पार्टीको केन्द्रीय कार्यालय सानेपामा जारी बैठकमा ‘गठबन्धन किन गर्ने ? गर्दा के हुन्छ ? केन्द्रबाटै गठबन्धन गर्ने कि स्थानीय आवश्यकताअनुसार गर्ने ?’ भन्ने तीनवटा प्रश्नमा बैठक केन्द्रित रहेको बैठकमा सहभागी एक केन्द्रीय सदस्यले जानकारी दिए ।
नेकपा माओवादीले निर्वाचनमा गठबन्धन गर्दा आफूले जितेका स्थानीय तह आफूसँगै राखेर एमालेले जितेका स्थानीय तहमा भागबन्डा गर्नुपर्ने बताउँदै आएको छ । त्यसो गर्दा कर्णालीका धेरै जिल्लामा कांग्रेस निल हुने कर्णाली प्रदेशका सभापति शाहीको भनाइ छ ।
