तारागाउँस्थित होटेल हायातको पार्किङ क्षेत्रबाट प्रहरीले बरामद गरेको युरेनियमजस्तो देखिने धातु पाँच महिनाअघि नै काठमाडौं ल्याइएको खुलेको छ । कारोबारमा संलग्न कांग्रेस ललितपुरका नेता नवराज महतसहित आठजनालाई प्रहरीले २ फागुनमा पक्राउ गरेको थियो ।
प्रहरीले बरामद गरेको युरेनियमजस्तो देखिने धातु ।
प्रहरीका अनुसार बरामद युरेनियमजस्तो देखिने धातु भारतीय नागरिक ६३ वर्षीय उपेन्द्रकुमार मिश्रले गत १४ असोजमा भारतको गयाबाट काठमाडौं ल्याएका थिए । त्यसअघि उनको सिन्धुपाल्चोक हेलम्बु गाउँपालिका–४ का रामकृष्ण लामिछाने र सिरहा लक्ष्मीपुर पतरी गाउँपालिका–३ का गोपीलाल दाससँग टेलिफोनमार्फत युरेनियम बिक्रीका विषयमा पटक–पटक वार्ता भएको थियो । महँगो मूल्यमा बिक्री हुने पक्का भएपछि उनले त्यो धातु जनकपुर हुँदै थानकोट नाकाबाट काठमाडौं भित्र्याएका थिए । काठमाडौंमा बिक्री गर्ने जिम्मा भने कांग्रेस ललितपुरका नेता महतले लिएका थिए ।
महानगरीय प्रहरी परिसर काठमाडौंका प्रवक्ता एसपी दिनेश मैनालीले महँगो मूल्यमा बिक्री हुने प्रलोभनमा बरामद धातु एक सय ४० दिनअघि नै काठमाडौं भित्रिएको बताए । ‘युरेनियमजस्तो देखिने धातुको अनुसन्धान सकिएको छैन । यो एक सय ४० दिनअघि नै काठमाडौं ल्याइएको देखिन्छ । महँगो मूल्यमा बिक्री गर्ने उनीहरूको योजना थियो । बरामद धातु युरेनियम भए–नभएको रिपोर्ट भने आइसकेको छैन,’ उनले भने ।
प्रहरीका अनुसार बरामद धातु उनीहरूले बौद्ध जोरपाटी नारायणटार शव चोकस्थित एएनजे होटेलमा लुकाएर राखेका थिए । धातु लुकाउन उनीहरूले होटेलको ४०२ र ४०४ नं.को दुईवटा कोठा असोजको दोस्रो सातादेखि नै बुक गरेका थिए । खरिद गर्न चाहने ग्राहकलाई उनीहरू काठमाडौंका पाँचतारे होटेलमा बोलाउँथे । सँगै लिएर गएको धातु देखाउँथे । रकमको डिल गर्थे । कुरा नमिलेपछि बुक गरी राखिएको होटेलको कोठामा धातुलाई पुनः लगेर लुकाउँथे । यस क्रममा उनीहरूले होटेल सोल्टी र होटेल मेरियटमा पटक–पटक ‘डिल’ गरेको अनुसन्धानबाट खुलेको छ ।
एसपी दिनेश मैनाली, प्रवक्ता महानगरीय प्रहरी परिसर काठमाडौं
युरेनियमजस्तो देखिने धातुको अनुसन्धान सकिएको छैन । यो एक सय ४० दिनअघि नै काठमाडौं ल्याइएको देखिन्छ । महँगो मूल्यमा बिक्री गर्ने उनीहरूको योजना थियो । बरामद धातु युरेनियम भए–नभएको रिपोर्ट भने आइसकेको छैन ।
‘उनीहरूले युरेनियमजस्तो देखिने धातु बिक्रीका लागि ग्राहकलाई तारे होटेलमा बोलाएर देखाउने गर्थे । धातुको मूल्य महँगो राखेका थिए । कुरा नमिलेपछि धातुलाई बुक गरी राखिएको होटेलस्थित कोठामा पुनः लगेर राख्थे । यो क्रममा धेरैपटक चलेको देखिन्छ,’ काठमाडौं परिसरका प्रवक्ता एसपी मैनालीले भने । खरिदकर्ता र विक्रेताबीच ‘डिल’ भएअनुसार बरामद धातुको मूल्य झन्डै एक अर्ब (९८ करोड) रुपैयाँ पर्छ । प्रहरीका अनुसार बरामद धातुको परिमाण दुई किलो आठ सय ग्राम छ । उक्त धातु प्रतिकिलो ३५ करोड रुपैयाँमा बिक्री गर्न दुई पक्षबीच ‘डिल’ हुँदै थियो । घटनामा पक्राउ आठजना २२ दिनदेखि प्रहरी हिरासतमा छन् ।
यसरी काठमाडौं आइपुग्यो युरेनियमजस्तो देखिने धातु
सत्तारुढ दल कांग्रेस ललितपुरका नेता महत घरमै थिए । चिनजानमा रहेका सिन्धुपाल्चोकका रामकृष्ण लामिछाने ‘युरेनियम’ बिक्रीको प्रस्ताव लिएर आइपुगे । एक अर्ब रुपैयाँको कारोबार हुने र बिक्रीबाट प्राप्त रकम दामासाहीमा बाँडिने लामिछानेको प्रस्तावले महत सोच्न बाध्य भए । आउँदो चुनावका प्रत्यासी उनलाई खर्चको आवश्यकता थियो । घरमै आएको अवसरलाई उनी खेर फाल्ने पक्षमा देखिएनन् । सरकार आफ्नै पार्टीको भएकाले उनी झन् हौसिए । र, लामिछानेलाई ‘युरेनियम’ काठमाडौं ल्याउन भने । लामिछानेको नियमित सम्पर्कमा थिए भारत बिहारस्थित गयाका उपेन्द्रकुमार मिश्र र सिरहा लक्ष्मीपुर पतारीका गोपीलाल दास । उनले युरेनियम काठमाडौं ल्याउन भने । महँगोमा बिक्री हुने भएपछि उपेन्द्रकुमार युरेनियम बोकेर जनकपुर आए । गोपीलाल र सिरहाकै ५५ वर्षीय जिवछनारायण यादवको सहयोगमा युरेनियम बोकेर काठमाडौं आए ।
नारायणटारस्थित शिवचोकमा बस्थे महोत्तरीका सुरेन्द्रप्रसाद चौधरी । उनकै सहयोगमा युरेनियम लुकाउन शिवचोकस्थित एएनजे होटेलको ४०२ र ४०४ नं.को दुईवटा कोठा बुक गरे । र, युरेनियम लगेर सोही कोठामा राखियो । विकिरणबाट हुने असरका कारण युरेनियमलाई नांगो आँखाले हेर्न सकिँदैन । त्यसैले प्रकाश नछिर्ने गरी छालाको कालो झोलाभित्र प्याकिङ गरिएको थियो । युरेनियम हेर्न भन्दै कांग्रेस नेता महत होटेल पुगे । धातु युरेनियम नै रहेको निष्कर्षपछि उनी ग्राहकको खोजीमा जुटे । उनीसँगै पक्राउ परेका सिन्धुपाल्चोक मेलम्ची नगरपालिका–१ का भूपेन्द्र खड्का र महोत्तरी एकडारा–६ बगैया कलुवाका राजु ठाकुर यहीक्रममा जोडिन आइपुगेका हुन् ।
पटक–पटकको प्रयासपछि पक्राउ परे अभियुक्त
काठमाडौंमा युरेनियमको कारोबार हुँदै गरेको सूचनापछि नेपाल प्रहरीको विशेष ब्युरोमा कार्यरत प्रहरी टोली गोप्य ढंगले परिचालित भयो । कारोबारमा संलग्न अभियुक्तको पहिचान भयो । ब्युरोको टोली रंगेहात पक्राउ गर्न चाहन्थ्यो अभियुक्तलाई । त्यसैले करोबारमा संलग्न हुनेहरूको सूक्ष्म निगरानीमा थियो प्रहरी । यहीक्रममा होटेल सोल्टीमा युरेनियम बिक्रीको डिल हुँदै गरेको सूचना ब्युरोको टोलीले पायो । टोली गोप्य ढंगले घटनास्थल पुग्यो । दुई पक्षबीच युरेनियम बिक्रीको डिल चल्यो । प्रहरी सोही ठाउँमा उनीहरूलाई पक्राउ गर्ने योजनामा थियो । तर, युरेनियम घटनास्थल नभएका कारण पक्राउ गर्ने योजना त्यतिकै तुहियो । त्यसपछि नक्सालस्थित होटेल मेरियटमा बिक्रीका लागि डिल हुने सूचना प्रहरीसमक्ष पुग्यो । ब्युरोको टोली घटनास्थल पुग्यो । दुई पक्षबीच डिल भइरहेको थियो । तर, यहाँ पनि युरेनियम नल्याएको हुँदा अभियुक्तलाई रंगेहात पक्राउ गर्ने प्रहरीको योजना असफल बन्न पुग्यो ।
होटेल हायातमा युरेनियमको पुनः डिल भइरहेको सूचनापछि ब्युरोको टोली तुरुन्तै घटनास्थल पुग्यो । घटनास्थलमा दुई पक्षबीच डिल चलिरहेको थियो । युरेनियम ल्याइएको पक्का भएपछि प्रहरीले घटनास्थलबाट कांग्रेस नेता महत र सिन्धुपाल्चोकका भूपेन्द्र खड्कालाई पक्राउ गर्यो । सोधपुछपछि युरेनियम होटेलकै पार्किङ क्षेत्रमा पार्किङ गरी राखिएको गाडीमा रहेको खुल्यो । नभन्दै बा.५प ८२०९ नम्बरको कारभित्र छालाको कालो झोलामा प्याक गरी राखिएको अवस्थामा युरेनियमजस्तो देखिने धातु बरामद भयो । प्रहरीका अनुसार धातु बरामद भएको कार नेता महतकै हो ।
