दीप श्रेष्ठको ‘पुनर्जन्म’ सेलिब्रेसन गर्न सरगम साँझ

कोभिड संक्रमणबाट जीवनमरणको दोसाँधमा पुगेर फर्किएका वरिष्ठ गायक दीप श्रेष्ठले ‘पुनर्जन्म’ भएको भन्दै सांगीतिक कार्यक्रम गर्ने भएका छन् । भरतपुर–१३, चम्पानगर÷ देवनगरस्थित लेक ट्वेन्टी थाउजेन्ड फार्म एन्ड रिट्रिट (एलटिके) हवेलीले ११ चैतमा उनको ‘पुनर्जन्म’ सेलिब्रेसन गर्न सांगीतिक कार्यक्रम आयोजना गरेको हो । 

सांगीतिक कार्यक्रमबारे जानकारी दिन आयोजित कार्यक्रममा वरिष्ठ गायक दीप श्रेष्ठले भने, ‘पहिलेको जस्तो गाउन सक्छु कि सक्दिन, चितवनमा हुने सरगम साँझले मेरो पनि परीक्षण गर्नेछ । पहिले एकै बसाइमा ५० वटा गीत गाउँथेँ, यसपटक भने करिब दुई घन्टा निरन्तर गीत गाउने तयारीमा छु । मेरा लागि अहिलेको जीवन पुनर्जन्म नै हो । आउनुहोस्, मेरो पुनर्जन्ममा रमाऔँ ।’

गायन रियालिटी सो भ्वाइस अफ नेपाल चलिरहेकै वेला गायक श्रेष्ठलाई कोभिड–१९ संक्रमण भएको थियो । तीन साताभन्दा बढी अस्पतालमा भर्ना भएका श्रेष्ठ मृत्युलाई जितेर फर्किएका थिए । 

उनका अधिकांश गीत नाच्ने खालका हुँदैनन् । उनका गीतले मान्छेलाई रुवाउँछन् । उनले भने, ‘मेरा गीतले श्रोताका अतितलाई सम्झाउँछन् । तर, यसपटक दर्शक नचाउने गीत गाउने प्रयासमा छु ।’ कम्तीमा २० वटा गीत गाउने उनको योजना छ ।

०२० सालदेखि नेपाली सांगीतिक आकाशमा उदाएका श्रेष्ठ संगीतकार तथा रचनाकारका रूपमा पनि स्थापित छन् । म त दूरदेखि आएँ तिम्रो नाम बोकेर ..., गुराँसको फूल सिउरी..., मेरी मायालु..., हर रात सपनीमा ऐँठन हुन्छ लगायतका थुप्रै चर्चित गीत श्रेष्ठले गाएका छन् । 

‘एलटिके सरगम साँझ २०७८’ नाम दिइएको कार्यक्रममा दृष्टिविहीन कलाकारहरू चिरीमाया महर्जन र अमला महर्जनको पनि सहभागिता रहनेछ । आयोजकले यो कार्यक्रमलाई स्व. गायक तथा कलाकार जयनन्द लामाप्रति समर्पण गरेको छ ।

एलटिके फार्मका सञ्चालकद्वय देवेन लोहनी र सीता गुरुङले वरिष्ठ गायक श्रेष्ठको नयाँ जीवनलाई सेलिब्रेसन गर्न कार्यक्रम आयोजना गरेको बताए । सांगीतिक क्षेत्रका जिउँदा हस्ती श्रेष्ठप्रति सम्मान गर्न यो कार्यक्रम आयोजना गरिएको उनीहरूको भनाइ छ । यसअघि नै कार्यक्रमको मिति तोकिए पनि कोभिड महामारीका कारण स्थगित भएको थियो । 

दीप श्रेष्ठ नाइटमा सहभागी हुन चाहनेलाई टिकट अनिवार्य गरिएको कार्यक्रमका प्रवद्र्धक राजेश शर्माले बताए । उनका अनुसार विभिन्न सेवासहित एक हजार र १५ सय टिकट मूल्य तोकिएको छ । करिब ११ बिघा क्षेत्रफलमा फैलिएको यस रिट्रिटले एक दशकदेखि चितवन आउने पर्यटकलाई सेवा दिँदै आएको छ ।