दूतावासकै कर्मचारीले उजुरी दिएर आफूलाई फसाउन खोजिएको पाण्डेको दाबी
दुबईमा बसेर नेपाली पत्रकारिता गरिरहेका उमाकान्त पाण्डे एक सातादेखि अबुधाबीको जेलमा छन् । दुबई प्रहरीले पक्राउ गरी उनलाई अबुधाबीस्थित अल वाथ्बा जेलमा राखेको परिवारका सदस्यले बताएका छन् । करिब एक दशकदेखि युएईमा बस्दै आएका अर्घाखाँचीका पाण्डेलाई ३ फागुनमा युएईको प्रशासनले हिरासतमा लिएको थियो । युएईस्थित नेपाली दूतावासका कर्मचारीले दायर गरेको साइबर अपराध मुद्दाअन्तर्गत आफूलाई पक्राउ गरिएको उनले हिरासतकक्षबाटै परिवारका सदस्यलाई जानकारी दिएका छन् ।
नेपाल पत्रकार महासंघका महासचिव रोशन पुरीले पाण्डेविरुद्ध साइबर अपराध लगाइएको आफूहरूले थाहा पाएको बताए । ‘उमाकान्त पाण्डे सात दिनदेखि दुबई प्रहरीको हिरासतमा छन् । परिवारका सदस्यसँग बुझ्दा उनीविरुद्ध साइबर अपराधअन्तर्गत मुद्दा लगाइएको सूचना छ । दूतावासकै उजुरीपछि पक्राउ गरेको परिवारका सदस्यले जानकारी दिएका छन्,’ उनले भने । पुरीले पाण्डेको अवस्था बुझ्न महासंघले केन्द्रीय सदस्य सुनिल खड्कालाई पठाएको र उनले नेपाली राजदूत तथा नेपालको परराष्ट्र मन्त्रालयसँग कुराकानी गरेको बताए । पाण्डे बुधबार जेलबाट छुट्न सक्ने उनको भनाइ छ ।
पारिवारिक स्रोतका अनुसार पाण्डेलाई युएईको प्रशासनले ३ फागुनमा फोन गरी कार्यालय बोलाएको थियो । सोहीअनुसार पाण्डे प्रशासन कार्यालय पुगेका थिए । त्यसलगत्तै बेपत्ता भएका उनी ४ फागुनमा परिवारका सदस्यसँग सम्पर्कमा आएका थिए । टेलिफोनमार्फत सम्पर्कमा आएका उनले आफू अबुधाबीको अल वाथ्बा जेलमा रहेको जानकारी दिँदै ‘दूतावासले मुद्दा फिर्ता लिएमा आफू छुट्ने, नत्र डिपोर्ट हुन सक्ने’ बताएका थिए । पाण्डेका श्रीमती र एक छोरा युएईमै छन् ।
पाण्डेले केही समयअघि दूतावासको विषयमा सामाजिक सञ्जालमा दूतावासमार्फत भिजिट भिसाको प्रोत्साहन भएको र दूतावासभित्र हुने गरेका गलत कुराहरूको आफूसँग प्रमाण रहेको लेखेका थिए । त्यसपछि दूतावासका कर्मचारी र पाण्डेबीच लामो बहस र चर्काचर्की भएको थियो ।
युएईका लागि नेपाली राजदूत कृष्ण ढकालले बाहिर आएजस्तो पत्रकार उमाकान्त पाण्डेविरुद्ध दूतावासले कुनै पनि मुद्दा दर्ता नगरेको दाबी गरे । पाण्डेको विषयमा जानकारी आएपछि दूतावासले निरन्तर उनको खोजी गरिरहेको बताए । युएईको विदेश मन्त्रालयमा सम्पर्क भएको र अनुसन्धानका क्रममा भएकाले पूर्ण विवरण पाउन नसकेको ढकालको भनाइ छ ।नेपाली दूतावासविरुद्ध लेखेको भनेर मुद्दा हालेर पत्रकार पाण्डेलाई नेपाल फर्काउन लगेको हो भन्ने नयाँ पत्रिकाको प्रश्नमा राजदूत ढकालले भने, ‘उमाकान्तजीको विषयमा दूतावासले निरन्तर खोजी गरेको छ । मुद्दाको वास्तविकता थाहा हुन सकेको छैन । युएईमा रहेर पत्रकारिता गरेकै आधारमा कोही नेपाली डिपोर्ट हुँदैन । त्यसो भएमा मलाई पदमा बस्ने अधिकार हुँदैन, म राजीनामा दिन्छु । छिट्टै वास्तविकता बाहिर आउनेछ ।’
नेपालको परराष्ट्र मन्त्रालयले भने पाण्डे पक्राउको सम्बन्धमा गैरजिम्मेवार ढंगले जवाफ दिएको छ । मन्त्रालयका प्रवक्ता सेवा लम्सालले पाण्डे पक्राउ सम्बन्धमा आफूलाई जानकारी नभएको र अवश्यक परे युएई दूतावासमै सोध्न सुझाव दिइन् । ‘मलाई पाण्डे पक्राउको सम्बन्धमा केही थाहा छैन, महामहिम उतै हुनुहुन्छ सोध्नुस्,’ उनले भनिन् ।
