लाख ऋण दिएर करोड असुल्ने सर्लाही बरहथवा–१० सीतापुरका रामबाबु राय यादवलाई उच्च अदालत जनकपुरले पुपक्र्षका लागि थुना राख्ने आदेश गरेको छ । २७ माघ ०७६ मा जिल्ला अदालत सर्लाहीले गरेको आदेशलाई बदर गर्दै उच्चले शुक्रबार यस्तो आदेश गरेको हो ।
चन्द्र सञ्जेल, सहायकन्यायाधिवक्ता, उच्च सरकारी वकिल कार्यालय जनकपुर
जिल्ला अदालत सर्लाहीले दुई वर्षअघि १५ लाख रुपैयाँ धरौटी तिरेर रामबाबुलाई छाड्ने आदेश गरेको रहेछ । उक्त आदेश बदर गरिपाऊँ भन्दै पीडित उच्च आए । सोही निवेदनमा शुक्रबार बहसपछि उच्चले जिल्लाको आदेश बदर गर्ने निर्णय गरेको हो ।
जिल्ला अदालतले दुई वर्षअघि १५ लाख रुपैयाँ धरौटी रकम तिरेर यादवलाई जेलमुक्त गर्ने आदेश गरेको थियो । जिल्लाको आदेश पुनरावलोकन गरिपाऊँ भन्दै पीडित उच्च अदालत जनकपुर पुगेका थिए । उच्चका न्यायाधीश विनोद शर्मा र रमेश ढकालको संयुक्त इजलासले दुई वर्षअघि जिल्लाले गरेको आदेशलाई बदर गर्ने निर्णय गरेको हो ।
उच्च सरकारी वकिल कार्यालय जनकपुरका सहायकन्यायाधिवक्ता चन्द्र सञ्जेलले जिल्ला अदालत सर्लाहीले गरेको आदेश बदर गर्ने निर्णय गरेको बताए । ‘जिल्ला अदालत सर्लाहीले दुई वर्षअघि १५ लाख रुपैयाँ धरौटी तिरेर रामबाबुलाई छाड्ने आदेश गरेको रहेछ । उक्त आदेश बदर गरिपाऊँ भन्दै पीडित उच्च आए । सोही निवेदनमा शुक्रबार बहसपछि उच्चले जिल्लाको आदेश बदर गर्ने निर्णय गरेको हो,’ उनले भने ।
रामबाबु सर्लाहीका खुंखार साहुकर हुन् । लाख रुपैयाँ ऋण दिएर उनी करोड रुपैयाँ असुल्थे । उनकै कारण सर्लाही, धनुषा, महोत्तरी, सिरहाका १५ सयभन्दा धेरै स्थानीय सुकुमबासी बन्न पुगेका छन् । यो विषयमा नयाँ पत्रिकाले दुई वर्षअघि समाचार प्रकाशन गरेको थियो । समाचारको प्रभावपछि प्रहरीले साहुकार रामबाबुलाई २४ पुस ०७६ मा सर्लाहीको हरिपुरबाट पक्राउ गरेको थियो । उनी त्यसवेला भेष बदलेर भारतको बिहारतर्फ भाग्दै थिए ।
साहुकार रामबाबुविरुद्ध २० करोड ४२ लाख ८० हजार ९५ रुपैयाँ ठगी गरेको भन्दै रामनाथ रायसहित २८ पीडितको जाहेरी छ । रामबाबु पक्राउ परेलगत्तै तत्कालीन राष्ट्रिय जनता पार्टीका स्थानीय कार्यकर्ताले विरोध गरेका थिए । पछि जिल्ला अदालत सर्लाहीले १५ लाख धरौटी रकम बुझाएर रामबाबुलाई हिरासतमुक्त गर्ने आदेश गरेको थियो । सोही आदेशपछि रामबाबु गाउँमै बस्दै आएका छन् । र, उनले आफ्नो पुरानो धन्दासमेत चालू राखेका छन् ।
पाँच अर्ब ऋण दिएको कागज बनाउने साहुकार रौनियार अझै पक्राउ परेनन्
सर्लाहीकै अर्का साहुकार हुन् सञ्जय रौनियार । उनले पनि सर्लाही, महोत्तरी, धनुषा, सिरहा, रौतहटलगायतका हजारजनाभन्दा धेरैलाई पाँच अर्बभन्दा बढी ऋण दिएको कागज गराएर सुकुमबासी बनाएका छन् । तर, उनलाई प्रहरीले अहिलेसम्म पक्राउ गर्न सकेको छैन । भारतको बिहारस्थित सीतामाढीमा उनको तीनतारे होटेल छ । उनी सोही होटेलमा बस्दै आएका छन् । भारत र नेपाली दुवै नागरिकता बनाएका उनी पटकपटक नेपाल आउने गर्छन् ।
आसामी उठाउँछन् । अनि सीतामाढी फर्कन्छन् । उनीविरुद्ध दुई वर्षअघि नै सर्लाहीका स्थानीयले प्रहरीमा जाहेरी दिएका थिए । त्यसलगत्तै उनी फरार भएका हुन् । उनले सर्वसाधारणलाई ऋण दिएर उनीहरूको जग्गा नै हडप्ने गरेका थिए । रौनियार ०७४ को निर्वाचनमा तत्कालीन नयाँ शक्ति पार्टीका तर्फबाट सर्लाही २ (क)मा उम्मेदवार थिए ।
