महिन्द्रा इलेक्ट्रिक मोबिलिटीले ट्रियो नामक लिथियम–आयोन सञ्चालित इलेक्ट्रिक थ्री–ह्विलर अटो सार्वजनिक गरेको छ । महिन्द्रा ट्रियो अटो ‘सफ्ट टप’ भेरियन्ट आठ लाख ४० हजार सोरुमको मूल्यमा निर्धारण गरिएको छ । महिन्द्राको भारतको बेंगलुरुस्थित फ्याक्ट्रीमै निर्माण भइरहेको गाडी दक्षिण नेपालको तराई क्षेत्रका लागि बुकिङ सुरु भएको छ । महिन्द्राको अधिकृत इभी वितरक अग्नि इनर्जीले नेपालमा ट्रियो बिक्री गर्नेछ । महिन्द्रा ट्रियोसँग ग्राहकले वार्षिक दुई लाख (पेट्रोल अटोको तुलनामा) बचत गर्न सक्नेछन् ।
महिन्द्रा ट्रियो १० हजारभन्दा बढी बिक्री भएको भारतको सबैभन्दा ठूलो लिथियम आयोन इलेक्ट्रिक अटो प्लेटफर्म हो । सन् २०१८ मा यसको सार्वजनिक भएदेखि यसले ६ करोड ३० किलोमिटरभन्दा बढी दूरी तय गरिसकेकोे कम्पनीले जनाएको छ ।
शुभारम्भ कार्यक्रममा बोल्दै महिन्द्रा इलेक्ट्रिक मोबिलिटी लिमिटेडका प्रमुख कार्यकारी अधिकृत सुमन मिश्रले भने, ‘नेपाल द्रुत गतिमा विकास भइरहेको अर्थतन्त्र हो, जसले वातावरणमैत्री साथसाथै दीर्घकालीन दिगोपनको एजेन्डा अपनाएको छ । नेपाल सरकारले विद्युतीय सवारीसाधनको प्रवद्र्धन गर्दै आएकाले यहाँ हाम्रो विद्युतीय थ्री–ह्विलर सवारीसाधनको शुभारम्भ गर्ने सही समय भएको छ ।’
महिन्द्रा ट्रियोका प्रमुख विशेषताहरू
- प्रतिकिमि ०.८ रुपैयाँभन्दा कमको सञ्चालन लागत
- फुल चार्ज आठ युनिट, प्रतियुनिट १२ रुपैयाँ र एक सय २० किमि गुड्ने
- आठ किलोवाटको ऊर्जा शक्ति र ४२ एनएमको टर्क
- प्रतिघन्टा ५५ किलोमिटर (केएमपिएच)सम्मको स्पिड
- प्रतिचार्जमा एक सय ३० किमिसम्मको प्रयोगयोग्य ड्राइभिङ दायरा
- मर्मत–सम्भारमुक्त, एक लाख ५० हजार किलोमिटर ब्याट्रीको आयु
- घरैमा १५ एम्पियर सकेटमा चार्ज गर्न सकिने
- तीन वर्ष वा ८० हजार किमि वारेन्टी ।
