सुदूरपश्चिमकै प्रसिद्ध उग्रतारा भगवती मन्दिरमा बिहीबार अष्टमी मेला लाग्ने भएको छ। नेपाली पात्रोअनुसार बुधबार महाअष्टमी परे पनि उग्रतारामा भने आज मात्रै अष्टमी मनाइने भएको हो।
अष्टमीका दिन उग्रतारमा राँगा र बोकाको बलि दिई पूजाआजा गरिन्छ । घटस्थापनादेखि गन्तीका हिसाबले आठौँ दिनमा अष्टमी मनाइने प्रचलन रहिआएकाले आज मात्रै अष्टमी मनाइने उग्रतारा क्षेत्र विकास समितिका अध्यक्ष तेजबहादुर साँकीले बताए। डडेल्धुरा सदरमुकामबाट चार किलोमिटर टाढा अमरगढी नगरपालिका– ८ को महकाली राजमार्गसँगै सुन्दर डाँडामा अवस्थित शक्तिपीठ उग्रतारा भगवतीको मन्दिरमा लाग्ने मेलामा हजारौँ दर्शनार्थी पूजा–आराधना गर्न पुग्छन्।
