प्रमुख प्रतिपक्षी दल नेकपा एमालेले अफगानिस्तानमा रहेका नेपाली नागरिकलाई तुरुन्त स्वदेश फिर्ता गराउन सरकारसमक्ष माग गरेको छ । प्रतिनिधिसभाको सोमबारको बैठकमा शून्य समयअघि नै बोल्दै एमालेका सांसद गोकुलप्रसाद बाँस्कोटाले द्वन्द्वग्रस्त मुलुक अफगानिस्तानमा भइरहेका राजनीतिक संघर्षका कारण अलपत्र परेका नेपालीहरूलाई तत्काल स्वदेश फर्काउन माग गरे ।
वर्तमान सरकारले अफगानिस्तानमा संकटमा परेका नेपालीलाई आफ्नो देश छ र देशमा सरकार छ भन्ने कुराको अनुभूति गराउन नसकेको पनि उनले बताए। सरकारको नेपालीलाई फर्काइनेछ भन्ने प्रतिबद्धताले नपुग्ने भन्दै उनले त्यहाँ रहेका नागरिक सुरक्षित छन् र सुरक्षित फर्काइनेछ भन्ने प्रतिबद्धतासँगै कार्यान्वयन पनि हुनुपर्ने बताए । उनले भने, ‘त्यहाँ संकटमा परेका नेपालीहरूले आफ्नो देश छ । आफ्नो देशमा सरकार छ । र, त्यहाँबाट हाम्रो सुरक्षाको निम्ति पहलकदमी हुन्छ भन्ने कुरा थाहा पाएनन् । हामी यसप्रकारको गैरजिम्मेवार र अनुत्तरदायी सरकार यो होला भनेर कल्पना गरिरहेका थिएनौँ । त्यहाँ रहेका नागरिकहरूको रक्षा हुनुपर्दछ । तिनको फिर्तीको व्यवस्था मिलाइनुपर्दछ । र, त्यो फेरि कुनै प्रतिबद्धताले पुग्दैन । सरकारले यस विषयमा संसदलाई जानकारी गराउनुपर्दछ । त्यहाँ रहेका नागरिक सुरक्षित छन् र सुरक्षित फर्काइनेछ भन्ने प्रतिबद्धता व्यक्त गर्नुपर्दछ । प्रतिबद्धतासँगै एक्सन गर्नुपर्दछ ।’
