इन्टरप्राइजेजको आवरणमा वर्षौंदेखि हुन्डी कारोबारमा संलग्न चारजनाबाट दुई करोड बरामद
केही समययता काठमाडौंको न्युरोड हुन्डी कारोबारको केन्द्रबिन्दु बन्दै जान थालेको छ । इन्टरप्राइजेजको आवरणमा वर्षौंदेखि हुन्डी कारोबार गर्दै आएका चारजना पक्राउ परेसँगै यस्तो तथ्य खुलेको हो । पक्राउ पर्नेमा ताहचलका तरुण अग्रवाल, तनहुँ भिमाद–१ का नितेश श्रेष्ठ, रामेछाप देउराली–२ का नरबहादुर खड्का र जोरपाटीका अर्जुन चौलागाई छन् । प्रहरीले उनीहरूबाट झन्डै दुई करोड रुपैयाँ बरामद गरेको छ ।
महानगरीय प्रहरी परिसर काठमाडौंबाट खटिएको प्रहरी टोलीले उनीहरूलाई न्युरोडस्थित गणबहालबाट पक्राउ गरेको हो । उनीहरूले तनुज इन्टरप्राइजेज प्रालिको आवरणमा हुन्डी करोबार गर्दै आएका थिए । इन्टरप्राइजेजका सञ्चालक तरुण हुन् । पक्राउ परेका अन्य उनका कामदार हुन् ।
परिसर प्रमुख एसएसपी अशोक सिंहले इन्टप्राइजेजका नाममा धेरै समयदेखि हुन्डीको कारोबार गर्दै आएको घटनाक्रमबाट पुष्टि हुने बताए । ‘विशेष सूचनाका आधारमा हामीले चारजनालाई पक्राउ गर्यौँ । अनुसन्धानका क्रममा उनीहरूले वर्षौंदेखि हुन्डी कारोबार गर्दै आएको देखिन्छ,’ उनले भने ।
गणबहालस्थित इन्टरप्राइजेजमा छापा मार्दा प्रहरीले घटनास्थलबाट ९१ लाख ९६ हजार रुपैयाँ नगद, ८० लाख ४३ हजार तीन सय १९ रुपैयाँको डिपोजिट स्लिप र ३६ लाख ८३ हजार ४ सय ४८ रुपैयाँ उल्लिखित विभिन्न बैंकका चेक बरामद गरेको छ । हुन्डी गर्ने मुलुक भने खुलिनसकेको परिसर प्रमुख एसएसपी सिंहले बताए । ‘एकपटकको छापामै यति धेरै रकम बरामद भएको छ । इन्टरप्राइजेजको अवस्था हेर्दा यति ठूलो रकमको कारोबार हुने कतैबाट पनि देखिँदैन । हामीले कम्प्युटरदेखि विभिन्न डिभाइस बरामद गरेका छौँ । अनुसन्धानपछि मात्रै हुन्डी गरी रकम पठाउने गरेको मुलुकको बारेमा खुल्छ,’ उनले भने । थप अनुसन्धानका लागि सबैलाई सम्पत्ति शुद्धीकरण विभाग पठाइएको प्रहरीले जानकारी दिएको छ ।
न्युरोडबाट हुन्डी कारोबारी पक्राउको शृंखला
यसअघि प्रहरीले गत १५ माघमा न्युरोडबाट २७ वर्षीया सानुकान्छी मोक्तान, २८ वर्षीय सञ्जय बुढा र २७ वर्षीय नवराज रावललाई पक्राउ गरेको थियो । उनीहरूको साथबाट प्रहरीले स्रोत नखुलेको १६ लाख ५० हजार र ११ लाख ५८ हजार रुपैयाँ २८ लाख ८ हजार रुपैयाँ बरामद भएको थियो । प्रहरीका अनुसार उनीहरू उक्त रकम इन्द्रचोकस्थित नागरिक कल्याण ऋण तथा बचत सहकारीमा डिपोजिट गराउन लैजाँदै थिए ।
गत ८ माघमै न्युरोडबाटै स्रोत नखुलेको १५ लाख २६ हजार रुपैयाँसहित सिन्धुपाल्चोक भोटेकोसी गाउँपालिका–३ का २४ वर्षीय छेवाङ शेर्पा पक्राउ परेका थिए । त्यसको अघिल्लो दिन अर्थात् ७ माघमा पनि न्युरोडबाटै दोलखा शैलुङ गाउँपालिका–८ का २६ वर्षीय शान्तवीर तामाङ पक्राउ परे । खनतलासी गर्दा उनको साथबाट पनि स्रोत नखुलेको नौ लाख ९० हजार रुपैयाँ बरामद भयो ।
६ पुसमा पनि न्युरोडबाटै स्रोत नखुलेको १३ लाख पाँच हजार रुपैयाँसहित धादिङ खनियाँवास गाउँपालिका–३ का २५ वर्षीय बिर्ज तामाङ पक्राउ परे । ‘न्युरोडमा सहकारी धेरै छन् । सोही सहकारीको अवरणमा पनि हुन्डी कारोबार हुँदै आएका छन् । विगतका घटनाले पनि यसलाई पुष्टि गर्छ । देखाउने अवरण एउटा, तर धन्दा अर्कै गर्नेहरू न्युरोडमा धेरै छन्,’ परिसर प्रमुख एसएसपी सिंहले भने ।
न्युरोडमा मात्रै तीन सय सहकारी
मुलुकभर २९ हजार सात सय ६१ सहकारी सञ्चालनमा छन् । बागमती प्रदेशमा मात्रै १० हजार ४१८ सहकारी छन् । सबैभन्दा धेरै सहकारी काठमाडौंमा दुई हजार पाँच सय ११ छन् । यसको झन्डै १२ प्रतिशत अर्थात् तीन सय सहकारी न्युरोडमै छन् । यति धेरै सहकारी न्युरोडमै खोलिनु र आर्थिक कारोबार पनि अर्बौंको देखिनु सन्देहपूर्ण देखिन्छ । सहकारी विभागका उपरजिस्ट्रार चोमेन्द्र न्यौपानेसमेत न्युरोडका केही सहकारीको धन्दा सन्देहपूर्ण देखिने स्वीकार गर्छन् ।
