अस्पतालको बिल तिर्न मेगा बैंकको कार्ड

मेगा बैंक नेपाल लिमिटेडले आफ्ना ग्राहकलाई अस्पतालमा उपचार गर्नका लागि आवश्यक रकम उपलब्ध गराउने उद्देश्यले ‘मेगा मेडी कार्ड’ नामक सुविधा ल्याएको छ । ग्राहक बिरामी हुँदा तत्कालै रकम जुटाउन गाह्रो–अप्ठ्यारो पर्न सक्ने अवस्थालाई मध्यनजर गर्दै बैंकले यो सुविधा ल्याएको हो । 

यो सुविधामार्फत मेगा बैंकका क्रेडिट कार्ड सुविधा उपभोग गरिरहेका ग्राहकले न्यूनतम २० हजार रुपैयाँदेखि १ लाख ५० हजार रुपैयाँसम्म क्रेडिट कार्ड (इन्स्टा–बाई) सुविधा १८ महिनासम्मका लागि उपभोग गर्न पाइने जनाइएको छ । यस व्यवस्थाले ग्राहकलाई उपचारका लागि तत्कालै रकमको जोहो गर्न सहज हुने विश्वास लिएको बैंकले जनाएको छ । बैंकले ग्राहकहरूले आवश्यक कागजपत्र पेस गरेको दुई दिनमा नै ग्राहकलाई यो सुविधा उपलब्ध गराउने व्यवस्था मिलाएको जनाएको छ । 

बैंकका डिजिटल तथा इ–बैंकिङ विभाग प्रमुख विश्व सिंहले यो सुविधाका लागि प्रक्रियागत शुल्क नलाग्ने व्यवस्था गरिएको बताए । त्यस्तै, क्रेडिट कार्डबापत लाग्ने शुल्कमा ५० प्रतिशत छुटको व्यवस्था गरिएको उनको भनाइ छ । बैंकबाट क्रेडिट कार्ड सुविधा प्रयोग गरिरहेका ग्राहकले हेल्थ प्याकेज लिन चाहेमा त्यसको भुक्तानी गर्ने सुविधासमेत ल्याएको बैंकले जनाएको छ । अस्पतालको बिल भुक्तानीका लागि बिरामीका परिवारलाई समेत नाता प्रमाणित प्रमाणपत्रका आधारमा रकम उपलब्ध गराइने भएकाले यो सुविधा निकै सहज र प्रभावकारी हुने बैंकले जनाएको छ । 

यसअन्तर्गत अस्पतालको बिल सोझै बैंकसमक्ष पेस गरी क्रेडिट कार्डमार्फत अस्पताललाई भुक्तानी गर्न सकिने र ग्राहकले आफूले भुक्तानी गरिसकेको बिलको शोधभर्नासमेत लिन सकिने जनाइएको छ ।