तीनपटकको विजेता स्पेनले शुक्रबार राति दश खेलाडीमा सीमित भएको स्विट्जरल्यान्डलाई टाइब्रेकरमा ३–१ ले स्तब्ध पार्दै चालू युरोकप २०२० च्याम्पियनसिपको सेमिफाइनल स्थान पक्का गरेको छ । निर्धारित ९० र अतिरिक्त ३० मिनेटमा स्पेन र स्विट्जरल्यान्डले १–१ को बराबरी खेलेका थिए । सेमिफाइनल पुग्ने टोलीको छिनोफानो टाइब्रेकरबाट हुँदा स्पेनको भाग्य खुलेको हो ।
टाइब्रेकरमा स्विट्जरल्यान्डका मारियो गार्भानोभिकले मात्र गोल गर्न सफल भए । स्पेनका डानी ओल्मो, जेरार्ड मोरेनो तथा मिकेल ओर्याजाबलले गोल गर्दै स्पेनलाई अन्तिम चारको स्थान सुरक्षित बनाए । यसअघि स्पेनका सर्जियो बुस्केट र रोड्रीका प्रहार असफल भएका थिए । मारियोले पेनाल्टी सुटआउटमा स्विट्जरल्यान्डलाई १–० को अग्रता दिलाए ।
तर, मारियोपछिका फाविएन स्चर, मानुएल अकान्जी तथा रुवेन भार्गासले टाइब्रेकरमा गोल गर्न नसक्दा स्विट्जरल्यान्ड क्वार्टरफाइनलबाटै बाहिरियो । स्पेनविरुद्धको खेलमा स्विट्जरल्यान्डका गोलरक्षक यान सोमेरले निर्धारित ९० तथा अतिरिक्तको ३० मिनेटमा निकै उत्कृष्ट बचाउ गरेका थिए । यद्यपि टाइब्रेकरमा पनि उनले स्पेनिस खेलाडीका प्रहार छेक्दै आफ्नो टोलीलाई सेमिफाइनल यात्राको आशा जीवितै राखेका थिए ।
यसअघि खेलको छैटाैँ मिनेटमा जोर्डी अल्वाले पोस्टभन्दा २२ यार्ड टाढाबाट प्रहार गरेको बल स्विट्जरल्यान्डका डेनिस जाकिरियाको खुट्टामा डिफ्लेक्ट हुँदै गोलमा परिणत भएको थियो । भिएआरमा जाकिरियाको आत्मघाती गोल देखिएपछि स्पेन खेलमा १–० ले अघि बढ्यो । चालू युरोकपमा यो दशौँ आत्मघाती गोल हो । दोस्रो हाफमा स्विट्जरल्यान्डले काउन्टर एट्याक्टमा बराबरी गोल फर्काउने रणनीति बनाएको थियो ।
खेलको ६६औँ मिनेटमा स्पेनको कमजोर डिफेन्सको फाइदामा स्विट्जरल्यान्डले १–१ को बराबरी गोल फर्काउन सफल भयो । रेमो फ्रेउएरले डिबक्सभित्र उपलब्ध गराएको पासमा कप्तान साकिरीले स्पेनिस गोलरक्षक सिमोनलाई छेक्न अवसर नदिई स्विट्जरल्यान्डलाई १–१ को बराबरीमा पु¥याए । स्विट्जरल्यान्डलाई खेलमा फर्काउन प्रत्यक्ष भूमिका निर्वाह गरेका रेमो फ्रेउएर ७७औँ मिनेटमा रातो कार्ड खाँदै मैदानबाट बाहिरिए । उनले स्पेनिस खेलाडी जेरार्ड मोरेनोलाई ट्याकल गरेका थिए । रेफ्रीले तत्कालै फ्रेउएरलाई रातो कार्ड देखाए ।
त्यसपछि स्विट्जरल्यान्ड बाँकी समय दश खेलाडीमा रहँदै स्पेनविरुद्ध प्रतिस्पर्धा गर्यो । एक गोलले पछाडि परेको स्विट्जरल्यान्डले मध्यान्तरअघि बराबरी गोल प्रयास गरेको थियो । यो अवधिमा स्विट्जरल्यान्डले दुई राम्रो अवसर खेर फाल्यो । खेलको ५४औँ मिनेटमा स्विट्जरल्यान्डका जाकिरियाको हेडिङ दोस्रो बारनजिक हुँदै बाहिरिएको थियो । खेलको ६३औँ मिनेटमा स्विट्जरल्यान्डले काउन्टर एट्याक्टमा उत्कृष्ट मुभ बनाएको थियो ।
सानो डिबक्सभित्र साकाले प्रहार गरेको बललाई स्पेनिस गोलरक्षक सिमोनले पहिलो बारमा डाइभ गरी क्लियर गर्दै आफ्नो टोलीलाई गोल खानबाट बचाएका थिए । प्रिक्वार्टरफाइनलमा स्विट्जरल्यान्डले सनसनी खेलमा विश्व च्याम्पियन फ्रान्सलाई टाइब्रेकरमा हराउँदै अन्तिम आठको स्थान पक्का गरेको थियो । तीनपटकको विजेता स्पेनले अन्तिम १६ को रोमाञ्चक तथा नाटकीय खेलमा क्रोएसियालाई अतिरिक्त समयमा ५–२ ले हराएको थियो ।
– एजेन्सीको सहयोगमा
