अख्तियार दुरुपयोग अनुसन्धान आयोगले पर्यटन विकास आयोजना बागमती प्रदेश हेटौँडाका सबइन्जिनियर नेत्रप्रसाद लामिछानेलाई घुस रकमसहित पक्राउ गरेको छ । निर्माण सम्पन्न भए पनि धरौटी रकम भुक्तानीका लागि ५० हजार घुस रकम लिँदै गर्दा लामिछाने पक्राउ परेको अख्तियारका प्रवक्ता नारायणप्रसाद रिसालले जानकारी दिए । उनी कार्यालय परिसरबाट पक्राउ परेका हुन् ।
नोलाइटका सुपरभाइजरसहित चारजनाविरुद्ध भ्रष्टाचार मुद्दा
आयोगले नेपाल विद्युत् प्राधिकरण, ढल्केबर नोलाइटका सुपरभाइजर जगतनारायण साहसहित चारजनाविरुद्ध भ्रष्टाचार मुद्दा चलाएको छ । सेवाग्राहीबाट घुस लिएको आरोपमा पक्राउ परेका साहसहित इलेक्ट्रिसियन यमकुमार महतो, ज्यालादारी प्राविधिक नवलकिशोर राउत र मनोहरकुमार महतोविरुद्ध अख्तियारले शुक्रबार विशेष अदालतमा मुद्दा दायर गरेको हो ।
उनीहरूले नयाँ मिटर जडानका लागि सेवाग्राहीसँग पाँच हजार रुपैयाँ घुस लिएको अख्तियारको दाबी छ ।
