फोर्ड गाडीका लागि नेपालको आधिकारिक विक्रेता जिओ अटोमोबाइल्स प्रालिले नयाँ फोर्ड इकोस्पोर्ट २०२१ संस्करण बुकिङ खुला गरेको छ । कम्पनीले नयाँ मोडल २०२१ का लागि २०२० को मूल्यमा नै बुकिङ खुला गरेको हो ।
मोडल २०२० का सम्पूर्ण गाडी बिक्री भइसकेकाले सीमित समयका लागि नयाँ मोडेल २०२१ पुरानै मूल्यमा दिन लागिएको कम्पनीले जनाएको छ । यसको शक्तिशाली प्रदर्शन, बहुमुखी प्रतिभा, क्षमता, परिष्कृत स्टाइल र उच्चतम प्रविधिले नेपालीको मन जितेको कम्पनीको दाबी छ । यसले लगातार नयाँ सुविधाहरू र प्रविधिहरूका साथ आफ्नो श्रेणी–सेगमेन्ट नै पुनः परिभाषित गर्दै आएको जनाइएको छ ।
२०२१ संस्करण इकोस्पोर्ट भारत स्टेज भिआईमा आधारित पेट्रोल र डिजेल इन्जिनका साथ २०२० संस्करण मूल्यमा बुकिङ खुला गरिएको कम्पनीको भनाइ छ । यो गाडी ड्राइभिङका लागि रमाइलो, शक्तिशाली र पेट्रोल–डिजेल इन्जिनका लागि विशिष्ट रोजाइ रहेको कम्पनीको दाबी छ ।
लाइन–अपमा फोर्डको नयाँ ३ सिलिन्डरयुक्त १.५ लिटर पेट्रोल इन्जिन समावेश छ । यसले १२२ पिएस पावर र १४९ एनएम टर्क प्रदान गर्ने जनाइएको छ । पेट्रोल इन्जिन पाँच स्पिड म्यानुअल ट्रान्समिसन र ६ स्पिड अटोमेटिक ट्रान्समिसनमा रहेको जनाइएको छ ।
इकोस्पोर्ट डिजेलमा १.५ लिटर डिजेल इन्जिन रहेको छ । यसले १०० पिएस पावर र २१५ एनएम टर्क प्रदान गर्ने कम्पनीले जनाएको छ । यो म्यानुअल ट्रान्समिसनमा उपलब्ध छ । इकोस्पोर्टमा ग्राहकका लागि सुरक्षित तथा आरामदायी सवारीका लागि उच्चतम प्रविधिहरू जडान गरिएको कम्पनीको दाबी छ । यसमा चालक र यात्रीको सुरक्षाका लागि ६ वटासम्म एयरब्याग रहेको जनाइएको छ ।
माथिल्लो मोडेलमा मनोरञ्जन तथा कनेक्टिभिटीका लागि ८ इन्चको टचस्क्रिनयुक्त सिन्क ३ सिस्टम, एप्पलकार प्ले तथा एन्ड्रोइड अटो अनुकूलतामा टप–इन लाइन इकोस्पोर्ट भेरियन्ट उपलब्ध रहेको कम्पनीले जनाएको छ । ९ इन्च टचस्क्रिनमा आधारित इन्फोटेनमेन्ट प्रणाली र सबैजसो भेरियन्टमा एम्बेडेड नेभिगेसन रहेको कम्पनीले जनाएको छ ।
