प्रधानमन्त्री केपी शर्मा ओलीले आह्वान गरी आज बसेको सर्वदलीय बैठकमा हिन्दूराष्ट्र बनाउनेदेखि राजासहितको प्रजातन्त्रसम्मका विषयमा कुरा उठेको छ ।
साथै, बैठकमा कोरोना महामारी नियन्त्रणमा सरकारले प्रभावकारी काम गर्न नसकेको भन्ने विषय पनि उठेको छ ।
बैठकमा कांग्रेसका नेताहरुले सरकारले कोरोना नियन्त्रणमा गम्भीर ढंगबाट काम गर्न नसकेकाले त्यसमा सक्रियतापूर्वक अग्रसर हुने विषय उठाएको कांग्रेसका नेता डा. प्रकाशसरण महतले जानकारी दिए ।
त्यसैगरी, आफूहरूले भ्रष्टाचार नियन्त्रणका विषयमा पनि कुरा उठाएको उनले बताए । साथै सरकार दमनकारी नीति लिएर अघि बढेकोबारे ध्यानाकर्षण गराएको उनले जानकारी दिए ।
अहिले सडकमा देखिएको प्रदर्शनका विषयमा भने ती प्रदर्शनहरू सरकारको गतिविधिबाट उत्पन्न असन्तुष्टि भएको भन्ने धारणा राखेको डा. महतले जानकारी दिए ।
उनले सरकार स्थापित लोकतान्त्रिक पद्धति अनुसार चलेमा ती प्रदर्शनहरु रोकिने भनाई राखेको बताए ।
त्यसैगरी राप्रपाका नेताहरूले भने देशलाई हिन्दूराष्ट्र बनाउनुपर्ने प्रस्ताव गरेका थिए ।
बैठकमा सहभागी दीपक बोहोराका अनुसार राप्रपाका नेताहरूले वर्तमान संविधानप्रति आफ्नो पूर्ण समर्थन रहेको भन्दै यही संविधानमा राजतन्त्रसहित हिन्दूराष्ट्र बनाउन सकिने विषय अघि सारेका थिए ।
साथै, उनीहरूले बैठकमा अहिले हिन्दुत्व र राजसंस्थाको पुनर्स्थापनालाई लिएर सडकमा भएको प्रदर्शनप्रति आफूहरूको नैतिक समर्थन रहेको बताएका थिए ।
नेता बोहोराले यही संविधानभित्र हिन्दूराष्ट्र र राजा राख्न सकिन्छ कि भनी विकल्प दिएको बताए ।
तर, आफ्नो भनाइका बारेमा कोही कसैले पनि जवाफ भने नदिएको उनले जानकारी दिए ।
साथै आफूहरूले कोरोनाविरुद्धको भ्याक्सिन निःशुल्क दिनुपर्ने धारणा राखेको उनले बताए ।
