भारतीय विदेशसचिव हर्षबर्धन शृंगलाले दुवै सरकारले भावी पुस्ताप्रति जवाफदेही भएर सशक्त सहकार्य गर्नुपर्ने बताएका छन् ।
नेपालको औपचारिक भ्रमणको दोस्रो दिन एआइडिआइए नामक चिन्तन प्रतिष्ठानद्वारा आयोजित प्रवचनमा शुक्रबार उनले दक्षिण एसियामा कुनै पनि मुलुक एक्लै अघि बढ्न नसक्नेसमेत स्पष्ट पारेका छन् ।
‘हामी भारत र नेपालका भावी पुसताहरूप्रति जवाफदेही छौँ । घनिष्ठ मित्रका रूपमा हामीले सँगै काम गर्नु आवश्यक छ,’ विदेशसचिव शृंगलाले नेपालीमा भने, ‘सशक्त सहकार्यमुखी नेपाल–भारत सम्बन्ध दुवै देशको हितमा छ ।’
विदेशसचिव शृंगलाले भारतको आर्थिक समृद्धि तथा भारतको उचाइसँग छिमेकी र मित्रका रूपमा नेपालसमेत जोडिएको उल्लेख गरे ।
विदेशसचिव शृंगलाले नेपाल र भारतबीच सीमालगायतका समस्याबारे केही बोलेनन् ।
उनले नेपाललाई छिमेकी र मित्रका रूपमा भारतले संकटमा सधैँ साथ दिएको भन्दै भूकम्पपछि भारतले गरेको सहयोगको पनि स्मरण गरे ।
नेपाल र भारतका युवाहरूबीच शिक्षा क्षेत्रमा सहकार्य भइरहेको र उनीहरू दुई देशका पुलका रूपमा रहेको पनि शृंगलाले उल्लेख गरे ।
नेपाल र भारतको राजनीतिक तहमा निरन्तर सम्पर्क र संवाद भइरहेको पनि शृंगलाको भनाइ थियो ।
भारतीय प्रधानमन्त्री नरेन्द्र मोदीले प्रधानमन्त्री भएको ६ वर्षमा चारपटक नेपालको भ्रमण गरेको तथा नेपालबाट ६ जना प्रधानमन्त्रीलाई स्वागत गरेको उनको भनाइ थियो ।
यसबीचमा नेपाल र भारतका नेतृत्वबीच विभिन्न समयमा १६ पटक भेट भएको पनि विदेशसचिव शृंगलाको भनाइ थियो ।
सीमापार रेलमार्ग, एकीकृत जाँच चौकी, सीमापार पेट्रोलियम पदार्थको पाइपलाइनमा असाधारण सहकार्य भइरहेकोसमेत उनले टिप्पणी गरे ।
विदेशसचिव शृंगला औपचारिक भ्रमण सकेर शुक्रबार दिल्ली फर्किँदै छन् ।
उनले बिहीबार नेपाली समकक्षी भरतराज पौड्यालसँग औपचारिक वार्ता गरेका थिए भने राष्ट्रपति विद्यादेवी भण्डारी, प्रधानमन्त्री केपी ओली, परराष्ट्रमन्त्री प्रदीप ज्ञवाली, कांग्रेस सभापति शेरबहादुर देउवासँग शिष्टाचार भेट गरेका थिए ।
भारतीय दूतावासद्वारा जारी विज्ञप्तिअनुसार विदेशसचिव शृंगलाले आसन्न नेपाल–भारत संयक्त आयोगको बैठकमा सहभागी हुन परराष्ट्रमन्त्री प्रदीप ज्ञवालीलाई निमन्त्रणा दिएका छन् ।
समकक्षी डा. एस जयशंकरको निमन्त्रणामा परराष्ट्रमन्त्री ज्ञवाली मंसिर अन्तिम साता दिल्ली जाने तयारी छ ।
शृंगलाले भारतका राष्ट्रपतिको सन्देश राष्ट्रपति भण्डारीलाई, भारतीय प्रधानमन्त्री नरेन्द्र मोदीको सन्देश प्रधानमन्त्री ओलीलाई तथा विदेशमन्त्री जयशंकरको सन्देश परराष्ट्रमन्त्री ओलीलाई दिएका थिए ।
