यस वर्षको भैरव पुरस्कार र प्रतिभा पुरस्कार क्रमशः रामकुमार पाँँडे र राजाराम पौडेललाई प्रदान गरिएको छ । भैरव पुरस्कार गुठीले शनिबार गोकर्णेश्वर–५ स्थित भैरव स्मृति भवनमा गरेको कार्यक्रममा गोकर्णेश्वर नगरपालिकाका प्रमुख सन्तोष चालिसेले पुरस्कार प्रदान गरेका हुन् । भैरव पुरस्कार र भैरव प्रतिभा पुरस्कारको राशि क्रमशः एक लाख र पचास हजार रुपैयाँ छ ।
सो अवसरमा नगर प्रमुख चालिसेले जोरपाटी चोकमा निर्माण गरिने नगरपालिकाको कार्यालयपरिसरमा अर्यालको पूर्ण कदको ढलोटको सालिक राखिने घोषणा गरे । पुरस्कृत स्रष्टा पाँँडे विदेशमा रहेकाले प्रतिनिधिका रूपमा उनको पुरस्कार ग्रहण गरेका डा.यादव ढुंगानाले हाँस्यव्यंग्य साहित्यमा पाँडेको योगदानको चर्चा गरे ।
कलाकार मदनकृष्ण श्रेष्ठले पुरस्कृत स्रष्टा राजाराम पौडेल नेपाली हाँस्य कला क्षेत्रका अमूल्य निधि भएको बताए । साहित्यकार विजय चालिसेले नेपाली हाँस्यव्यंग्य साहित्यलाई उर्वर बनाउने काम भैरव अर्यालले गरेको स्मरण गरे ।
चालिसे संयोजक तथा वरिष्ठ समालोचक प्रा.डा.खगेन्द्र लुइँटेल र व्यंग्यकार लक्ष्मण गाम्नागे सदस्य रहेको चयन समितिको आधारलाई अनुमोदन गर्दै भैरव पुरस्कार गुठीले पाँडे र पौडेललाई पुरस्कृत गर्ने निर्णय गरेको हो ।
भैरव पुरस्कार गुठीका सचिव वसन्त रिजालले ०४६ देखि प्रत्येक दुई–दुई वर्षमा पुरस्कार प्रदान गरिँदै आएकोमा आगामी वर्षबाट बर्सेनि वितरण गरिने जानकारी दिए ।
