संस्कृति, पर्यटन तथा नागरिक उडड्यनमन्त्री योगेश भट्टराईले अमादब्लम हिमालको आरोहण गरी स्वदेश फर्कन लागेका कतारका राजकुमार शेख मोहम्मद विन अब्दुल्लालाई सम्मान गरेका छन् ।
काठमाडौंमा शनिबार आयोजित कार्यक्रमबीच मन्त्री भट्टराईले कोभिड– १९ को महामारीबीच राजकुमार अब्दुल्लाले हिमाल आरोहण गरी नेपालको पर्यटन क्षेत्रमा उत्साह जगाएको भन्दै राकुमारसहितको आरोही टोलीलाई मायाको चिनो प्रदान गरी बिदाइ गरे ।
राजकुमार शेख मोहम्मदसहित १३ सदस्यीय टोलीले गत २६ कात्तिकमा ६ हजार आठ सय १४ मिटर अग्लो अमादब्लम हिमालको सफल आरोहण गरेको थियो । उक्त आरोहण अमादब्लम हिमालमा अटम सिजनको पहिलो आरोहण थियो । राजकुमारसहितको आरोही टोलीमा ६ सदस्य थिए । यसमा केही अमेरिकी र क्यानेडियाली आरोही सहभागी थिए ।
उक्त आरोहणमा म्यारेट मेडिसिनको नेतृत्वमा ६ विदेशी र आठ नेपाली सहभागी थिए ।
पर्यटनमन्त्री भट्टराईले पर्यटकीय गतिविधि क्रमशः चलायमान हुँदै गएकाले अब छिट्टै नेपालको पर्यटन पुरानै लयमा फर्कने विश्वास व्यक्त गरे ।
सन् २००९ देखि नेपाल आउन थालेका राजकुमार अब्दुल्लाको यो आठौँपटकको यात्रा हो । सन् २०१३ मा सगरमाथा आरोहण गरेका उनी तीनपटक सगरमाथाको आधार शिविर पुगेका छन् ।
नेपालका अन्य पर्यटकीय गन्तव्यमा पाइला टेकेका अब्दुल्लाले नेपालको प्राकृतिक सुन्दरता र आतिथ्य सत्कारबाट आफू प्रभावित रहेको भन्दै नेपाल विश्वकै सुन्दर देश भएकाले फेरि पनि नेपाल आउने चाहना प्रकट गरे । उनी आइतबार स्वदेश फर्कने कार्यक्रम छ ।
