सामसुङको बहुप्रतीक्षित फोल्डेबल स्मार्टफोन ग्यालेक्सी जेड फोल्ड–२ सोमबारदेखि नेपाली बजारमा प्रि–बुकिङ सुरु भएको छ । अघिल्लो महिना मात्रै विश्व बजारमा सामसुङले फोल्डेबल स्मार्टफोन सार्वजनिक गरेको थियो । किताबजस्तै फोल्ड गर्न मिल्ने स्मार्टफोन इ–कमर्स प्लेटफर्म स्मार्टडोको डटकमबाट पाँच हजार रुपैयाँ अग्रिम बुझाएर प्रि–बुकिङ गर्न सकिनेछ । यो स्मार्टफोन इ–कमर्स प्लेटफर्ममा दुई लाख ४९ हजार ९९९ रुपैयाँमा किन्न सकिने कम्पनीले जनाएको छ ।
-नेपाली स्मार्टफोन बजारमा नोकिया २.४ प्रवेश गरेको छ । एचएमडी ग्लोबलले आइतबार नेपालमा नयाँ स्मार्टफोन सार्वजनिक गरेको हो । ६.५ इन्चको एचडी प्लस स्क्रिन रहेको स्मार्टफोन भिडियो स्ट्रिमिङ र गेमिङका लागि उत्तम रहेको कम्पनीले जनाएको छ । यो स्मार्टफोनमा ४५ सय एमएएच क्षमताको ब्याट्री राखिएको छ । फिंगरप्रिन्ट र फेस अनलकजस्ता आधुनिक बायोमेट्रिक सेक्युरिटी फिचर रहेको स्मार्टफोनमा डुअल क्यामेरा, एआई इमेजिङबाट फ्युल्ड विस्तृत नाइट र पोट्रेट सट फिचर समावेश छ । दुई जिबी र्याम र ३२ जिबी रोम रहेको यो स्मार्टफोनको मूल्य नेपालमा १४ हजार ५९९ रुपैयाँ तोकिएको छ ।
-चिनियाँ स्मार्टफोन ब्रान्ड साओमीका बजारमा एमआई १० र एमआई नोट १० लाइट स्मार्टफोन उपलब्ध छन् । एमआई १० को सबैभन्दा आकर्षक विशेषता भनेको यसमा रहेको १०८ मेगापिक्सेलसहितको क्वाड क्यामेरा सेटअप हो, यसमा चारवटा क्यामेरा राखिएको छ । यो स्मार्टफोनमा थ्रिडी कब्र्ड एमोलेड डिस्प्ले र फास्टेस्ट ३० वाट वायरलेस चार्जिङ सुविधा छ ।
मोबाइलमा ४७८० एमएच क्षमताको ब्याट्री राखिएको छ । क्यामेरामा रहेको प्राइमरी सेन्सरले नांगो आँखाले नदेखिने विवरणहरूको अल्ट्रा क्लियर सटहरू खिच्न सक्ने कम्पनीको दाबी छ । यसको क्यामेराले ३० एफिएसमा युएचडी ८ के भिडियो खिच्न सक्छ । एमआई १० सुन्दर डिजाइन र भर्सटाइल कार्यक्षमताको पूर्ण संयोजन भएको स्मार्टफोन हो । दुईवटा कलरमा उपलब्ध यो स्मार्टफोनको मूल्य ८९ हजार ९९९ रुपैयाँ रहेको छ ।
-साओमीकै एमआई नोट १० लाइटमा ६४ एमपी क्वाड कोर सेटिङ छ । यसमा ५२६० एमएएच क्षमताको ब्याट्री हुनाले एकपटक चार्ज गरेर दुई दिन प्रयोग गर्न सकिन्छ । यो ६ जिबी र्याम र १२८ जिबी रोमसहित तीन कलरमा उपलब्ध छ । यसको बजार मूल्य ४४ हजार ९९९ रुपैयाँ तोकिएको छ । यस्तै, साओमीकै रेडमी नोट ९ प्रो–म्याक्स पनि नेपाली बजारमा उपलब्ध छ ।
यसमा नयाँ क्वालकम स्न्यापड्रैंगन ७२० जी प्रोसेसरका साथ इन्ट्रिगेसन, ५०२० एमएएच क्षमताको ब्याट्रीलगायत सुविधा छन् । यसमा ६.६७ इन्चको एफएचडी प्लस डट डिस्प्लेका साथ २०.९ सिनेमेटिक स्क्रिनले इमर्सिभ अनुभव ल्याउँछ । नोट १० लाइटमा ६४ मेगापिक्सेल ब्याक क्यामेरा छ । यस्तै, फ्रन्टमा ठूलो ३२ एमपी सेन्सर छ, जसले उच्च गुणस्तरको फोटोग्राफी, भिडियोग्राफी र एआई फेस अनलक सक्षम गर्दछ । रेडमी नोट ९ प्रो म्याक्स ६ जिबी र्याम र १२८ जिबी स्टोरेज क्षमता भएकोलाई ३१ हजार ९९९ र ८ जिबी र्याम र १२ जिबी स्टोरेज क्षमता भएको भेरियन्टलाई ३४ हजार ९९९ रुपैयाँ पर्छ ।
-अहिले नेपाली बजारमा सामसुङको ग्यालेक्सी नोट २० र नोट २० अल्ट्रा स्मार्टफोन उपलब्ध छन् । नोट २० सिरिजमा कम्प्युटरमा जस्तै काम गर्न सकिने र गेमहरू खेल्न सकिने कम्पनीले जनाएको छ । नोट २० मिस्टिक ब्रोन्ज, मिस्टिक ग्रे र मिस्टिक ग्रिन कलरमा उपलब्ध छ । यस्तै, नोट २० अल्ट्रा मिस्टिक ब्रोन्ज र मिस्टिक ब्ल्याक कलरमा उपलब्ध छ ।
नेपाली बजारमा नोट २० को मूल्य एक लाख नौ हजार ९९९ र नोट २० अल्ट्राको मूल्य एक लाख ३९ हजार ९९९ रुपैयाँ तोकिएको छ । नोट २० अल्ट्रा फाइभ जी नेटवर्क प्रविधिमा आधारित छ । नोट २० मा ६४ मेगापिक्सेल र नोट २० अल्ट्रामा १०८ मेगापिक्सेल ट्रिपल रियर क्यामेरा रहेका छन् जसले ८ के क्वालिटीको भिडियो खिच्न सक्छ । वाइड रेन्जको फोटो खिच्न नोट २० र नोट २० अल्ट्रा निकै उपयुक्त स्मार्टफोन हो । अगाडिको सेल्फी क्यामेरा १० मेगापिक्सेलको छ । नोट २० मा ६.७ इन्च र नोट २० अल्ट्रामा ६.९ इन्च ठूलो डिस्प्ले रहेको छ ।
-नेपाली बजारमा एप्पलको आइफोन ११, ११ प्रो र ११ प्रो म्याक्स स्मार्टफोन उपलब्ध छन् । एप्पलको नेपाली विक्रेता जेनेरेसन नेक्स्ट कम्युनिकेसन गत वर्ष आइफोन ११ सिरिज नेपालमा सार्वजनिक गरेको थियो । यसै वर्षभित्र एप्पल आइफोन १२ सिरिज सार्वजनिक गर्ने तयारीमा छ । नेपालमा २५६ जिबी स्टोरेज भएको आइफोन ११ को मूल्य एक लाख ४४ हजार, ११ प्रोको मूल्य एक लाख ६९ हजार र ११ प्रो–म्याक्सको मूल्य एक लाख ८६ हजार रुपैयासँम्म रहेको छ ।
नेपालमा आइफोन ११ सिरिजको विभिन्न भेरियन्ट र स्टोरेज क्षमता हेरीकन एक लाख १८ हजारदेखि २ लाख ३७ हजारसम्मका उपलब्ध छन् । आइफोन ११ प्रो र ११ प्रो म्याक्स विभिन्न चार कलरमा उपलब्ध छ । आइफोन ११ मा ६.१ इन्च, ११ प्रोमा ५.८ इन्च र ११ प्रो म्याक्समा ६.५ इन्चको डिस्प्ले छ । यो मोबाइलले ४ के भिडियो खिच्न सकिन्छ ।
एप्पलले हालै आइफोन एसई सार्वजनिक गरेको छ । यो स्मार्टफोन १६ जिबी, ६४ जिबी, १२८ जिबी र २५६ जिबी स्टोरेज क्षमतामा उपलब्ध छ, जसको मूल्य क्रमशः ३५ हजार, ६७ हजार ५००, ७६ हजार र ९० हजार रुपैयाँ रहेको छ । यसमा ४.७ इन्चको डिस्प्ले, १२ मेगापिक्सेल क्यामेरा, ३ जिबी र्याम १८२१ एमएएच क्षमताको ब्याट्री रहेको छ ।
-नेपाली विक्रेता आई हबसँग सम्झौता गरेर मोबाइल एप रिचार्जरले भदौ तेस्रो साता वान प्लस ८ र ८ प्रो स्मार्टफोन सार्वजनिक गर्यो । पछिल्लो समय वान प्लस ब्रान्डका मोबाइल नेपालीमाझ लोकप्रिय बन्दै गइरहेका छन् । दुवै मोडल १२ जिबी र्याम र २५६ जिबी स्टोरेज क्षमतामा भित्रिएका हुन् । वान प्लस ८ मा पछाडि ४८ मेगापिक्सेलको मुख्य क्यामेरासहित तीनवटा क्यामेरा रहेका छन् ।
यस्तै, वान प्लस ८ प्रोमा दुईवटा ४८/४८ मेगापिक्सेलका क्यामेरासहित चारवटा क्यामेरा राखिएको छ । दुवै मोडलको फ्रन्टमा १६ मेगापिक्सेल क्यामेरा छन् । वान प्लस ८ मा ४३०० एमएएच क्षमताको ब्याट्री रहेको छ भने वान प्लस ८ प्रोमा ४५१० एमएएच क्षमताको ब्याट्री छ । वान प्लस ८ मा ६.५५ इन्चको डिस्प्ले छ भने ८ प्रोमा ६.७८ इन्चको डिस्प्ले छ । नेपाली बजारमा वान प्लस ८ को मूल्य ९३ हजार र वान प्लस ८ प्रोको मूल्य एक लाख २५ हजार रुपैयाँ तोकिएको छ ।
