निजामती कर्मचारी दिवसको अवसरमा मालिका गाउँपालिकाका कर्मचारीले स्थानीय एक विपन्न परिवारका लागि नयाँ घर निर्माण गर्ने गरी अभियान चलाएका छन् । मालिका– ८ की अपांगता भएकी राधिका सुनारको घर निर्माणमा उनीहरूले अभियान सञ्चालन गरेका हुन् ।
गाउँपालिकाका प्रमुख प्रशासकीय अधिकृत दीपक भण्डारीका अनुसार जीर्ण घरमा बस्दै आएकी राधिकालाई नयाँ घर बनाइदिने अभियानस्वरूप कर्मचारीको तर्फबाट एकमुष्ट ७५ हजार प्रदान गरिएको छ । घर निर्माणका लागि डम्बरबहादुर पौडेलको अध्यक्षतामा पाँच सदस्यीय समिति पनि गठन गरिएको छ । गाउँपालिकाका प्रमुख रितबहादुर थापामार्फत समितिका अध्यक्ष पौडेललाई नगद प्रदान गरेको उनले बताए । ‘कर्मचारी सधैँ नागरिककै सेवा छन्, सहयोग गर्ने दिवस अर्को अवसर बन्यो,’ उनले भने, ‘कर्मचारी र नागरिकबीचको सम्बन्ध मजबुत भएको उदाहरण मात्रै प्रस्तुत गरेका हौँ ।’
५० वर्षीया राधिकासँग सम्पत्तिको नाममा जीर्ण कच्ची घर र पाँच पाथी अन्न फल्ने बारी छ । दिनभर काम नगरे साँझ उनको घरको चुलो बल्दैन । शारीरिक रूपमा कमजोर उनी सधैँ काम गर्न पनि सक्दिनन् । रोजगारीका लागि भारत गएका उनका श्रीमान् भीमबहादुर सुनार कामकै सिलसिलामा घाइते अवस्थामा भारतमै छन् । राधिकाकी ११ वर्षीया छोरी संगीता पनि अपांग छिन् । उनकी छोरी आँखा देख्दिनन् । डेढ वर्षीय छोरा र अपांग छोरी हुर्काउने सबै जिम्मेवारी राधिकाकै काँधमा छ ।
राधिकाको घरमा सोमबार गाउँपालिकाका प्रमुखसहित जनप्रतिनिधि र कर्मचारी पुगेर घर निर्माण गरिदिने घोषणा गरेका हुन् । घर बनाउने घोषणासहित पैसासमेत दिएपछि राधिकामा खुसीको सीमा नै रहेन । ‘मलाई थाहै थिएन, सरहरू भगवान् आएजस्तै आउनुभयो,’ उनले भनिन्, ‘खुसी नहुने कुरै भएन, बुढेसकालमा सुरक्षित ओत पाउने भएँ ।’ गाउँपालिका प्रमुख थापाले महिलाको पारिवारिक अवस्था र कर्मचारीको सहयोगी भावले अत्यन्तै प्रभावित भएको बताए । उनले कर्मचारीसँगै रहेर गाउँपालिकाले घर निर्माणमा सहयोग गर्ने प्रतिबद्धता जनाए ।
