काठमाडौं/ लगातारको वर्षापछि काठमाडौं उपत्यकासहित देशका विभिन्न स्थानमा शनिबार दिउँसोदेखि मौसममा सुधार देखिन थालेको छ। शुक्रबारदेखि भएको वर्षाका कारण प्रभावित जनजीवन मौसम खुल्न थालेसँगै क्रमशः सामान्य बन्दै गएको छ।
भारतको बंगालको खाडीमा विकसित चक्रवात ‘अर्नब’ को प्रभावका कारण शुक्रबारदेखि देशका अधिकांश स्थानमा वर्षा भएको थियो। लगातारको वर्षाले सडक तथा बजार क्षेत्रमा आवागमन प्रभावित हुँदा सर्वसाधारणले सास्ती खेप्नुपरेको थियो।
शनिबार दिउँसोदेखि वर्षाको मात्रा घटेसँगै काठमाडौं उपत्यकाको आकाश खुल्न थालेको छ। मौसममा सुधार आएपछि सडकमा सवारीसाधनको चाप बढ्नुका साथै बजार तथा सार्वजनिक स्थानमा पनि चहलपहल बढेको छ।
लगातारको वर्षाका कारण सुस्ताएको दैनिक जनजीवन मौसममा आएको सुधारसँगै क्रमशः पुरानै लयमा फर्किन थालेको छ।
