बेलायतको लन्डनस्थित ब्ल्याकहिथमा पानस रेस्टुरेन्ट तथा पानस हेल्पिङ ह्यान्ड्स सञ्चालन गर्दै आएका सुजन कटुवालले रसुवाको विनाशकारी बाढीबाट प्रभावित समुदायको राहत तथा पुनर्स्थापनाका लागि नेपालमा सहयोग उपलब्ध गराएका छन्।
पानस र यसका सहयोगीमार्फत संकलित सहयोग रकम नेपाल आएर अर्थमन्त्री डा. स्वर्णिम वाग्लेलाई औपचारिक रूपमा हस्तान्तरण गरिएको जनाइएको छ। सहयोग रकम बाढी प्रभावितको राहत तथा पुनर्स्थापनामा प्रयोग गर्ने उद्देश्य राखिएको छ।
रसुवामा आएको बाढीपछि कटुवाल र पानस टोलीले ग्राहक तथा समुदायको सहयोगमा ‘नेपाल फ्लड इमर्जेन्सी अपिल’ सञ्चालन गरेका थिए। सोही अभियानअन्तर्गत लन्डनको ब्ल्याकहिथस्थित पानस रेस्टुरेन्टमा मैनबत्ती प्रज्वलन कार्यक्रमसमेत आयोजना गरिएको थियो। कार्यक्रममा स्थानीय जनप्रतिनिधि, नेपाली गोर्खा समुदाय तथा स्थानीय समुदायका सदस्य सहभागी भएका थिए।
कटुवालको मानवीय सेवासम्बन्धी अभियान कोभिड– १९ महामारीदेखि निरन्तर रहेको जनाइएको छ। महामारीका क्रममा कटुवाल तथा पानस टोलीले बेलायतको राष्ट्रिय स्वास्थ्य सेवाअन्तर्गतका स्वास्थ्यकर्मी, गोर्खा भूतपूर्व सैनिक, घरबारविहीन व्यक्ति तथा सहयोग आवश्यक रहेका समुदायका सदस्यलाई दुई लाख ५० हजारभन्दा बढी निःशुल्क खाना उपलब्ध गराएको थियो।
महामारीपछि पनि पानस टोलीले हरेक मंगलबार लन्डनका घरबारविहीन व्यक्तिलाई तातो गोर्खाली खाना उपलब्ध गराउँदै आएको जनाएको छ। सामुदायिक सेवामा पुर्याएको योगदानको कदरस्वरूप कटुवाललाई जनवरी २०२६ मा बेलायती राजपरिवारबाट ‘एमबिई’ सम्मान प्रदान गरिएको स्रोत सामग्रीमा उल्लेख छ।
नेपाल आएका कटुवालले सहयोग रकम हस्तान्तरणमा मात्र सीमित नरही बाढी प्रभावित क्षेत्रको भ्रमण गर्ने योजना पनि बनाएका छन्। प्रभावित समुदायसँग प्रत्यक्ष भेटेर उनीहरूको वास्तविक आवश्यकता बुझ्ने तथा दीर्घकालीन पुनर्स्थापनामा गर्न सकिने सहयोग पहिचान गर्ने उनको योजना छ।
‘करुणा केवल भावनामा सीमित हुनुहुँदैन, त्यसलाई व्यावहारिक कार्यमा रूपान्तरण गर्नुपर्छ। म प्रभावित समुदायमाझ प्रत्यक्ष उपस्थित भएर उनीहरूको कुरा सुन्न र उनीहरूलाई पुनर्स्थापित तथा पुनर्निर्माण गर्न हामीले कसरी प्रभावकारी सहयोग गर्न सक्छौँ भन्ने बुझ्न चाहन्छु,’ कटुवालले भने।
उनको अभियान बेलायतमा समेत जारी रहने जनाइएको छ। आगामी नोभेम्बरमा पानसले ‘लर्ड मेयर्स साे २०२६’ मा नेपालको संस्कृति तथा दुई सय वर्षभन्दा लामो गोर्खा विरासत प्रस्तुत गर्न सहयोग गर्ने कार्यक्रम रहेको स्रोत सामग्रीमा उल्लेख छ।
कटुवालले अभियानमा सहयोग गर्ने पानसका ग्राहक, सहयोगदाता, साथीभाइ, ब्ल्याकहिथ समुदाय तथा विभिन्न व्यक्ति र संस्थाप्रति आभार व्यक्त गरेका छन्।
