- चार सदस्यसम्मको परिवारलाई मासिक १५ हजार तथा त्यसभन्दा बढी परिवार संख्या भएमा थप प्रतिसदस्यबराबर दुई हजारका दरले खर्च उपलब्ध गराउने मन्त्रिपरिषद्को निर्णय
- राष्ट्रिय योजना आयोग र राष्ट्रिय विपत् जोखिम न्यूनीकरण तथा व्यवस्थापन प्राधिकरणले तयार गरेको प्रारम्भिक क्षति मूल्यांकन प्रतिवेदनअनुसार बाढीमा ७ हजार ५७० घर क्षतिग्रस्त
भोटेकोशी बाढीबाट घरबारविहीन बनेका पीडितलाई सरकारले अस्थायी आवासका लागि मासिक खर्च उपलब्ध गराउने भएको छ । राष्ट्रिय योजना आयोग र राष्ट्रिय विपत् जोखिम न्यूनीकरण तथा व्यवस्थापन प्राधिकरणले तयार गरेको प्रारम्भिक क्षति मूल्यांकन प्रतिवेदनअनुसार बाढीमा सात हजार ७७० घर क्षतिग्रस्त भएका छन् । तीमध्ये कतिपय पूर्ण र कतिपयमा आंशिक क्षति भएको विवरण छ । चार सदस्यसम्मको परिवारलाई मासिक १५ हजार तथा त्यसभन्दा बढी परिवार संख्या भएमा थप प्रतिसदस्यबराबर दुई हजारका दरले खर्च उपलब्ध गराउने सरकारको निर्णय छ ।
सुविधा लिन नचाहनेलाई भने स्थायी आवास निर्माण नभएसम्म अस्थायी आवासको व्यवस्था गर्ने विकल्प पनि उपलब्ध गराउने सरकारको निर्णय छ । सञ्चारमन्त्री विक्रम तिमिल्सिनाले भने, ‘विवरण संकलनका लागि सम्बन्धित स्थानीय तहमा फाराम पठाइसकिएको छ ।’ सरकारी तथ्यांकअनुसार हाल दुई हजार ७१२ जना पीडित होल्डिङ सेन्टरमा बस्दै आएका छन् ।
आयोग र प्राधिकरणले तयार गरेको प्रारम्भिक क्षति मूल्यांकन प्रतिवेदनअनुसार सबैभन्दा धेरै नुवाकोटमा मात्र तीन हजार ९७७ घर क्षतिग्रस्त छन् । नुवाकोटको विदुरभित्र मात्र तीन हजार २६ घरमा क्षति पुगेको छ । त्यस्तै, रसुवामा एक हजार ४७९, धादिङमा एक हजार ४५१, गोरखामा २६३ र चितवनमा एक सय घरमा क्षति पुगेको छ । निजी घरमा मात्र ६३ अर्ब ८८ करोडको क्षति भएको सरकारीको प्रारम्भिक प्रतिवेदन छ । लाङटाङ क्षेत्रमा गएको हिमपहिरोका कारण गत १० भदौमा भोटेकोशीमा बाढी आउँदा आसपासको क्षेत्रमा ठुलो क्षति भएको हो । बाढीले टिमुरे, स्याफ्रुबेँसी तथा वेत्रावती बजारमा सर्वाधिक क्षति पुर्याएको छ । बाढीले चितवनसम्म क्षति गरेको थियो ।
