नेपालले एसिसी प्रिमियर कपको उपाधि भिडन्तमा तेस्रोपटक युएईसँग प्रतिस्पर्धा गर्ने भएको छ । मलेसियामा चलिरहेको प्रतियोगिताअन्तर्गत बिहीबार भएका दुई वटै सेमिफाइनलमा नेपाल र युएई विजयी हुँदै उपाधिका लागि एक–आपसमा प्रतिस्पर्धा गर्न लागेका हुन् । एसिसी प्रिमियर कपको शनिबार हुने फाइनलमा विजयी हुने राष्ट्रले आगामी एसिया कपमा छनोट हुनेछ । नेपाल र युएईले दोस्रोपटक एसिया कपमा स्थान बनाउने योजनामा छन् ।
युएई लगातार दोस्रोपटक एसिया कप खेल्ने लक्ष्यका साथ नेपालविरुद्ध प्रतिस्पर्धा गर्नेछ । गत संस्करणको फाइनलमा नेपाललाई हराउँदै युएई पहिलोपटक एसिया कपमा स्थान बनाएको थियो । सन् २०२३ मूलपानी माथिल्लो मैदानमा भएको फाइनलमा युएईलाई हराउँदै नेपाल पहिलोपटक एसिया कप पुगेको थियो । एसियन क्रिकेट काउन्सिल (एसिसी)ले एसिया कपमा टेस्ट राष्ट्रसँग खेल्न एसोसिएट राष्ट्रबाट एक टोली छनोट गर्ने प्रावधान बनाएको छ ।
यसपटक सुरुमा तीन राष्ट्र लैजाने घोषणा गरे पनि एसिसीले अन्तिम समयमा एक मात्रै राष्ट्र एसिया कपमा हुने निर्णय गर्यो । यसपटक एसिसी प्रिमियर कपमा १० टोली सहभागी थिए । नेपाल समूह ए मा रहँदा युएई समूह ‘बी’मा थिए । दुवै टोली आ–आफ्नो समूहका विजेता हुन् । सन् २०२७ को एसिया कप बंगलादेशमा हुँदै छ । जहाँ सर्वाधिक च्याम्पियन भारतसँगै श्रीलंका, पाकिस्तान, बंगलादेश र अफगास्तिानले खेल्ने पक्का भएको छ ।
ओमानविरुद्ध दीपेन्द्रको अलराउन्ड प्रदर्शन
नेपाललाई लगातार तेस्रोपटक फाइनल स्थान सुरक्षित गराउनमा दीपेन्द्रसिंह ऐरीले अलराउन्ड प्रदर्शन गरेका थिए । उनले ब्याटिङ र बलिङमा उत्कृष्ट प्रदर्शन गरेका हुन् । बायुमास मैदानमा पहिलो ब्याटिङ गरेको नेपाल ४५.५ ओभरमा १४७ रनमा समिटएको थियो । ओमानले नेपालविरुद्ध घातक बलिङ गरी फाइनल पुग्ने आशा बलियो बनाएको थियो ।
प्रतिओभर तीन रनरेटमा ब्याटिङ गर्नुपर्ने लक्ष्य पाएको ओमानको पनि फितलो प्रदर्शन भयो । सन्दीप लामिछानेको कप्तानीमा रहेको नेपाल समक्ष १४७ रन रक्षा गर्नु चुनौती थियो । तर, स्पिनर दीपेन्द्रले बलिङमा ११ रन खर्चेर तीन विकेट लिए । उनले फिल्डिङ क्रममा महत्वपूर्ण दुई विकेट हात पारेपछि नेपाल फाइनलमा पुग्यो । दीपेन्द्रले ब्याटिङ क्रममा ५१ रनको अर्धशतकीय योगदान दिएका थिए । उनले यसक्रममा ७६ बलमा चार चौका प्रहार गरेका थिए ।
इनिङ्सको एक समय नेपाल ११.२ ओभरमा ३६–४ को कमजोर अवस्थामा थियो । दीपेन्द्र र बसिर अहमेदले पाँचौँ विकेटका लागि ९३ रनको साझेदारी गर्दै नेपाललाई ३५.५ ओभरमा १२९–५ को स्थितिमा राखे । बसिरले आफ्नो विकेट व्यक्तिगत ४७ रनमा खेलिरहँदा गुमाएका थिए । उनले ८८ बलमा तीन चौका र एक छक्का प्रहार गरे । बसिर आउट भएपछि नेपालले बाँकी पाँच विकेट केवल १८ रनमा गुमाएको थियो । नेपाल १२९–५ बाट १४७–१० मा समेटियो ।
ओमान ६० रनमा अलआउट
१४८ रन लक्ष्य पछ्याएको ओमानको ब्याटिङ निकै कमजोर भयो । ओमानको पूरै टोली ओमान २८.१ ओभरमै केवल ६० रनमा अलआउट भएको थियो । नेपालका लागि कप्तान सन्दीपले पनि कसिलो बलिङ गरेका थिए । उनले ६ ओभरमा एक मेडन राखी नौ रन खर्चेर तीन विकेट लिए । यसैगरी, ललित राजवंशीले पाँच ओभरमा दुई मेडन राखी १२ रन खर्चेर दुई विकेट लिए । रोहित पौडेलले ४.१ ओभरमा सात रन दिएर दुई विकेट लिँदा एक मेडन ओभर गरेका थिए । ओमानका लागि जतिन्दर सिंहले सर्वाधिक २५ तथा जितेन रमानन्दीले १३ रन बनाए । अन्य कुनै पनि ब्याट्सम्यानले दोहोरो अंकमा रन बनाउन सकेनन् । करण केसी र शेर मल्ल विकेटविहीन भए ।
शीर्ष ब्याट्सम्यान चुके
टस हारेर पहिले ब्याटिङ गरेको नेपालका लागि शीर्ष ब्याट्सम्यान चुके दीपेन्द्र र बसिरबाहेक कुनै पनि ब्याट्सम्यानले उल्लेख्य योगदान गर्न सकेनन् । बसिर र दीपेन्द्रले १४७ बलमा उत्कृष्ट साझेदारी गरेका थिए । ओपनर देव खनाल १३ रन, आसिफ सेख ११ रन, ईशान पाण्डे एक रन, रोहित तीन रन बनाएर आउट भएका थिए । अलराउन्डर गुल्सन झा सात, करण केसी पाँच र सन्दीप तीन रनमा आउट भए । ओमानका बलर जयविक्रम र हस्नैन शाहले समान तीन विकेट लिएका थिए ।
युएई सात विकेटले विजयी
युएईले पाँचपटक एसिया कप खेलेको हङकङलाई सात विकेटले हराउँदै उपाधिनजिक पुगेको हो । टस हारेर सुरुमा ब्याटिङ गरेको हङकङ ३०.१ ओभरमा अलआउट हुँदा मात्र ७० रन बनायो । युएईले ११.१ ओभरमा तीन विकेट गुमाउँदै पूरा गर्यो । युएईका ओपनर तनिश सुरीले सर्वाधिक २७ रन, अदिव उस्मानीले १६ तथा अक्षदीप नाथले ११ रनको योगदान गरेका थिए । यसअघि हङकङका लागि ओपनर जिसान अलीले १७, काल्हन चालुले १३ तथा किन्चित शाहले ११ रन मात्रै बनाएका थिए । युएईका हैदर अलीले एक्ले ६ विकेट लिए ।
